Хитойда амалга оширилган комплекс чора-тадбирлар коронавирусга чалиниш бўйича ҳолатларнинг ўсиб бориш кўрсаткичининг камайишига хизмат қилди, халқаро экспертлар ҳам тақдим этилган статистик маълумотларнинг тўғри эканини тасдиқлаган. Бу ҳақда Жаҳон соғлиқни сақлаш ташкилоти бош директорининг ёрдамчиси Брюс Эйлвард маълум қилди, деб ёзмоқда «РИА Новости».
«Икки ҳафта аввал Хитойга келган вақтимда коронавирусга чалиниш бўйича кунига икки мингга яқин янги ҳолат аниқланарди, бизнинг ҳамкорликдаги миссиямиз натижаси ўлароқ ушбу рақамлар сезиларли даражада камайди. Кеча коронавирусга йўлиқиш бўйича 409 та янги ҳолат кузатилди, бу икки ҳафта давомида ушбу кўрсаткичнинг тахминан 80 фоизга камайганини англатади», – деган Эйлвард.
Унинг сўзларига кўра, Хитой танлаган стратегия ва инфекциянинг тарқалишига қарши кураш чора-тадбирлари коронавируснинг фаол равишда тарқалиб бориш тенденциясини ўзгартира олди ва буни мамлакатда бўлиб турган ЖССТ вакиллари ҳам тасдиқлаган статитистик маълумотлар ҳам кўрсатиб турибди.
«Маълумотлар мунтазам равишда янгиланиб турибди, бу статистика ҳам ўзгарувчан эканини англатади. Бизнинг ҳамкорликдаги жамоамиз турли манбалар асосида статистик маълумотларни текшириб кўрди ва ушбу камайиш ҳақиқатан ҳам амалга ошгани тасдиқланди», – дейди у.
Эйлварднинг қайд этишича тадқиқотлар вақтида халқаро экспертлар гуруҳи тадқиқотлар давомида вируснинг тарқалиш суръати пасайганини англатувчи бир нечта далилларни аниқлаган.
Таркибига Хитой ва хориж мамлакатларидан 25 нафар эксперт кирган ЖССТ халқаро жамоаси ХХРга 16 февралда келган ва Пекин шаҳри, Гуандун ва Сичуан провинциялари ҳамда Ухань шаҳрида тадқиқотлар ўтказган.
Мавзуга доир:
Изоҳ (0)