Хитой ташқи ишлар вазири вакили Чжао Лицзянь мамлакатлар соғлиқни сақлаш соҳасидаги умумий хавфга қарши курашиш учун бирлашиш ва ҳамкорлик қилиши кераклиги ҳақида баёнот берди. Шу тариқа Хитой ТИВ вакили АҚШнинг коронавирус бўйича баёнотига муносабат билдирди, деб ёзмоқда «РИА Новости».
Чжао Лицзяннинг таъкидлашича, касалликка қарши курашда фан, ақл ва ҳамкорликка таяниш керак.
АҚШ Давлат департаменти томонидан қилинган баёнотга кўра, Россия билан боғлиқ минглаб аккаунтлар ижтимоий тармоқларда ёлғон маълумотлар тарқатиб, жаҳон миқёсида вирусга қарши кураш бўйича олиб борилаётган ишларга путур етказмоқда. Давлат департаменти баёнотида айтилишича, мазкур аккаунтлар коронавирус тарқалиши ортида АҚШ тургани ҳақидаги фикрни илгари сурмоқда ҳамда АҚШнинг обрўсига путур етказмоқда.
Россия Давлат Думаси мазкур айбловларга кескин муносабат билдирди. Давлат Думасининг халқаро ишлар бўйича қўмитаси раисининг биринчи ўринбосари Дмитрий Новиков биологик қуроллар яратиш билан бир қатор мамлакатлар шуғулланаётганига ва АҚШ бу масалада етакчи ўринда турганига эътибор қаратган.
Аввалроқ Хитой коронавирус лабораторияда ишлаб чиқарилган, деган миш-мишларни рад этган эди. Хитой парламенти коронавирус сабабли йиллик сессияни кейинга қолдиришга қарор қилди.
Шунингдек, АҚШ президенти Дональд Трамп Си Цзиньпин коронавирус муаммосини бартараф этишига ишонч билдирди. Россия иқтисодиёти коронавирус сабабли ҳар куни қарийб миллиард рубль йўқотаётгани маълум бўлди.
Сўнгги маълумотларга кўра, Хитойда коронавирус инфекциясидан бир кунда 150 киши вафот этиб, қурбонларнинг умумий сони 2592 кишига етди. Хитойда яна 406 киши коронавирус юқтириб олган (шундан 348 нафари Уханда), касалланган фуқаролар сони эса 77 150 кишига етган. Касалликдан даволаниб, шифохонани тарк этганлар сони 24 734 кишини ташкил этиб, сўнгги бир суткада 1846 киши даволангани айтилмоқда. Хитойнинг Ухань шаҳрида 24 февраль ҳолатига кўра, 195 киши коронавирус билан қайта касаллангани маълум бўлди.
Изоҳ (0)