Эронда коронавирус билан касалланиш ҳолатлари сони 60 тага етди. Бу ҳақда Эрон соғлиқни сақлаш ва тиббий таълим вазири ўринбосари Ираж Харирчи хабар берди, деб ёзмқода «ТАСС».
Вазир ўринбосарининг сўзларига кўра, таҳлиллари ижобий натижа берган кишилар сони 61 кишини ташкил қилган. Касалликдан вафот этганлар сони эса 12 кишига етган.
Шу билан бирга, Эрон парламентининг Қум вилоятидан сайланган депутати Аҳмад Амирободий Фараҳоний расмий маълумотларни шубҳа остига олган. Унинг сўзларига кўра, 23 февраль куни кечки пайт ҳолатига кўра, коронавирус қурбонлари сони 50 кишига етган. Бироқ депутат мазкур маълумонинг манбасини кўрсатмаган ҳамда мазкур вирус Қум вилоятига уч ҳафта аввал кириб келганини таъкидлаган.
Эрон Соғлиқни сақлаш вазирлиги мамлакатда коронавирус билан касалланиш бўйича биринчи ҳолат ҳақида 19 февраль, чоршанба куни, маълум қилган. Касалланганлар Қум шаҳрида қайд этилган.
Эрон коронавирус қурбонлари сони бўйича Хитойдан сўнг иккинчи мамлакатга айланди. Арманистон бош вазири Никол Пашинян Facebook’даги саҳифасида Эронда коронавирус инфекцияси тарқалгани сабаб Арманистон Эрон билан чегарани ёпиб, авиақатновларни икки ҳафтага тўхтатганини маълум қилган. Туркия ҳукумати ҳам худди шундай чоралар кўришини маълум қилган. Афғонистон ва Грузия Эрон билан авиақатновларни тўхтатган, Покистон эса Эрон билан чегарани вақтинча ёпган.Хитой Миллий соғлиқни сақлаш комиссияси маълумотларига кўра, Хитойда коронавирус инфекциясидан вафот этганлар сони бир суткада 150 кишига кўпайиб, қурбонларнинг умумий сони 2592 кишига етди. Касалликдан даволаниб, шифохонани тарк этганлар сони эса 24 734 кишига етган. Бундан ташқари, хитойлик олимлар коронавирус касаллик аломатлари пайдо бўлишидан икки кун аввал юқиши мумкинлигини ҳам аниқлади.
Изоҳ (0)