Италияда коронавирусдан вафот этганлар сони олти кишига етди

Италияда коронавирус юзага келтирган касаллик сабабли вафот этганлар сони олти кишига етди. Олтинчи қурбон Ломбардия вилоятида касалхонага ётқизилган ва онкологик касалликка чалинган аёл бўлган. Бу ҳақда «ТАСС» хабар берди.

Қайд этилишича, коронавирус сабабли Италияда вафот этганларнинг барчаси соғлиғида муаммоси бор кексалар бўлган.

Маълум бўлишича, коронавирус билан касалланиш бўйича жами 220 тадан ортиқ ҳолат аниқланган. Ухандан эвакуация қилинган бир нафар италиялик тузалиб кетган.

Италиянинг Ломбардия вилоятидаги Лоди шаҳрида коронавирус билан касалланиш ҳолати 21 февраль, жума куни, қайд этилган. Шундан сўнг, касалланиш ҳолатлари Венето, Пьемонт ва Эмилия-Романье вилоятларида аниқланган. Мазкур ҳудудларда касалланганлар сони ортиб бормоқда. Бунга қадар Италияда коронавирус юқтириб олиш билан боғлиқ учта ҳолат қайд этилган эди. Улар хитойлик сайёҳ эр-хотин ва Ухандан эвакуация қилинган италиялик аёл бўлган.Италияда коронавирус тарқалиши сабабли карнавал, модалар намойиши, футбол учрашувлари бекор қилинди. Италия поездларининг йўловчилари эса коронавирусга текширилгандан кейингина Австрия чегарасидан ўтишга рухсат берилмоқда.Шунингдек, Эрон ва Жанубий Кореяда ҳам коронавирус кенг тарқалмоқда. Афғонистонда коронавирус билан боғлиқ дастлабки ҳолат аниқланди. Буюк Британияда коронавирусга чалинганлар сони 13 кишига етди. Озарбайжонда 2 киши коронавирус гумони билан касалхонага ётқизилди. Хитойда коронавирус билан қайта касалланиш бўйича 195 та ҳолат аниқланди.

Хитой Миллий соғлиқни сақлаш комиссияси маълумотларига кўра, Хитойда коронавирус инфекциясидан вафот этганлар сони бир суткада 150 кишига кўпайиб, қурбонларнинг умумий сони 2592 кишига етди.  Касалликдан даволаниб, шифохонани тарк этганлар сони эса 24 734 кишига етган. Бундан ташқари, хитойлик олимлар коронавирус касаллик аломатлари пайдо бўлишидан икки кун аввал юқиши мумкинлигини ҳам аниқлади.