Ироқда 24 февраль, душанба куни, коронавирус билан касалланиш бўйича биринчи ҳолат қайд этилди. Бу ҳақда мазкур ҳолат қайд этилган Нажаф провинцияси соғлиқни сақлаш департаментига таяниб, «ТАСС» хабар бермоқда.
Департамент раҳбари Радван ал-Киндийнинг маълум қилишича, касаллик диншунослик бўйича ўқиётган эронлик талабада аниқланган. Талаба Ироқ томонидан Эрон фуқароларининг мамлакатга киришини чеклаш ҳақидаги қарор қабул қилинишидан олдин келган.
Қайд этилишича, талабанинг касалланганлиги Эрондан келганлар кишилар ва талабаларни текширувдан ўтказиш доирасида, унинг уйида ўтказилган тиббий кўрик вақтида аниқланган. Талаба касалхонага ётқизилган. Ундан олинган таҳлил намуналари эса лаборатория текшируви учун жўнатилган.
Шунингдек, Афғонистонда ҳам коронавирус билан боғлиқ дастлабки ҳолат аниқланди. Озарбайжонда 2 киши, жумаладан, бир нафар эронлик коронавирус гумони билан касалхонага ётқизилди. Эрон, Жанубий Корея ва Италияда коронавируснинг кенг тарқалиши кузатилмоқда. Буюк Британияда коронавирусга чалинганлар сони 13 кишига етди. Хитойда коронавирус билан қайта касалланиш бўйича 195 та ҳолат аниқланди.
Эрон коронавирус қурбонлари сони бўйича Хитойдан сўнг иккинчи мамлакатга айланди. Сўнгги маълумотларга кўра, 43 киши касалланган. Арманистон бош вазири Никол Пашинян Facebook’даги саҳифасида Эронда коронавирус инфекцияси тарқалгани сабаб Арманистон Эрон билан чегарани ёпиб, авиақатновларни икки ҳафтага тўхтатганини маълум қилган. Туркия ҳукумати ҳам худди шундай чоралар кўришини маълум қилган. Афғонистон ва Грузия Эрон билан авиақатновларни тўхтатган, Покистон эса Эрон билан чегарани вақтинча ёпган.
Хитой Миллий соғлиқни сақлаш комиссияси маълумотларига кўра, Хитойда коронавирус инфекциясидан вафот этганлар сони бир суткада 150 кишига кўпайиб, қурбонларнинг умумий сони 2592 кишига етди. Касалликдан даволаниб, шифохонани тарк этганлар сони эса 24 734 кишига етган. Бундан ташқари, хитойлик олимлар коронавирус касаллик аломатлари пайдо бўлишидан икки кун аввал юқиши мумкинлигини ҳам аниқлади.
Изоҳ (0)