Хитой Соғлиқни сақлаш миллий комиссияси айни вақтда мамлакат ҳудудида 42 638 кишида касаллик ҳолати қайд этилгани ҳақида маълум қилди. Короновирус ҳақида 11 февралнинг муҳим хабарлари.
Касалланганлар ва вафот этганлар
Хитойда коронавирус оқибатида вафот этганлар сони 1016 кишидан ошиб кетди. Маълумотларга кўра, айни вақтда мамлакат ҳудудида 42 638 кишида касаллик ҳолати қайд этилган. 37 726 киши ҳозирда даволанишда бўлиб, улардан 7333 нафарининг аҳволи оғир. Жами 3996 киши касалликдан даволаниб, тиббиёт муассасасидан уйига жавоб бериб юборилган.
Туркманистоннинг Лебоб вилоятида коронавирус касаллигидан бир киши вафот этди. У Хитойдан эвакуация қилинган Туркманистон фуқароларидан бири бўлган. Қайд этилишича, марҳум ҳақидаги маълумотлар қатъий сир сақланмоқда. Шунингдек, Лебоб вилоятидаги карантинда оғир аҳволда ўрта ёшли фуқаро сақланаётгани айтилмоқда.
Россиянинг Тюмень шаҳрида коронавирусдан тузалган талаба қизга уйига жавоб берилди. Лаборатория текширувлари қизнинг бутунлай соғайганини кўрсатган. Бемор қиз билан мулоқотда бўлган бошқа талабаларда вирус аниқланмаган. Уларга ҳам карантиндан сўнг уйига рухсат берилади.
Россияда 20 минг нафар одам коронавирус туфайли назоратга олинган, АҚШда эса коронавирусга чалинган одамлар сони 13 нафарни ташкил қилмоқда.
Японияда коронавирус билан касалланган 161-бемор қайд этилди. Улардан 135 нафари Йокогама портига келган пайтда ичида 3700 киши бўлган Diamond Princess саёҳат кемаси йўловчилари ва экипаж аъзоларидир.
Мавзуга доир: Целлофан остига яширинган хитойликлар, ахлат титаётган Ўргимчак одам, Ироққа ёққан қор. 11 февралнинг энг қизиқарли суратлари
Вьетнамда коронавирусни юқтирганлар сони 15 нафарга етди — касалланганлар орасида уч ойлик чақалоқ ҳам бор.
Ўзбекистондаги вазият
Санитария-эпидемиологик осойишталик агентлиги январь ойидан бошлаб 10 февраль кунигача коронавирус инфекциясига текширилган 812 та намуналарда коронавирус инфекцияси топилмаганини хабар қилди. Коронавирусга қарши марказий штаб 10 февраль ҳолатига кўра, Ўзбекистонда коронавирус касаллиги қайд этилмаганини маълум қилди.
Соғлиқни сақлаш вазирлиги республикадаги мактабгача таълим муассасалари раҳбариятига болаларни коронавирусдан сақлаш бўйича эслатма билан чиқди.
Жаҳондаги вазият
АҚШ президенти Дональд Трамп Хитойда тарқалган коронавирусга қарши кураш жорий йилнинг апрель ойида якунига етишини башорат қилди. «Коронавирус бўйича: одамлар касалликнинг апрель ойида кунлар исиши натижасида йўқ бўлиб кетишини айтмоқда,» — дея Трампнинг губернаторлар билан учрашувда айтган сўзларини келтирган пресс-пул.
АҚШда Миллий хоккей лигаси клублари ва ўйинчилари Хитойда тарқалган коронавирус сабаб ўйин клюшкалари тақчиллиги муаммосига дуч келмоқда, деб ёзади Boston Globe. Таъкидланишича, лига ўйинчиларининг қарийб 75 фоизи Хитойдаги корхоналар томонидан тайёрланадиган клюшкалардан фойдаланади. Коронавирус тарқалиши сабаб эса клюшкаларни етказиб бериш узилиб қолган. Аввалроқ 421 та компания шу йилнинг биринчи чорагидаги даромадлари тўғрисидаги ҳисоботларида Хитойда тарқалган коронавирус молиявий натижаларга салбий таъсир кўрсатиши мумкинлигини билдирганди.
Хитой тараққиёт ва ислоҳотлар бўйича миллий комиссияси вакили Цун Лян мамлакатдаги асосий саноат тармоқлари бўйича корхоналар коронавирус тарқалиши шароитида ишлаб чиқаришни давом эттиришни бошлаганини маълум қилди. «Мамлакатдаги умумий вазиятдан келиб чиқсак, Хубэй провинциясидан ташқари барча жойларда ишлаб чиқариш, айниқса, тиббиёт ва озиқ-овқат маҳсулотлари, энергетика, транспорт ва логистика каби асосий ишлаб чиқариш соҳалари ўз фаолиятини аста-секин тикламоқда», — деган Цун Лян.
Хитой Халқ Республикаси раиси Си Цзиньпин томонидан иқтисодий фаолиятни тартибга солиш, бу орқали эпидемик вазиятнинг иқтисодиётга таъсирини таҳлил қилиш, уни камайтириш ва шу йил учун ижтимоий-иқтисодий тараққиёт мақсадларини белгилаб олиш кераклиги маълум қилди. «Иқтисодиётимизнинг узоқ келажакдаги тараққиёти ўзгармаслигига ишончни янада мустаҳкамлаш лозим. Эпидемиянинг иқтисодиётга таъсири вақтинчалик, муаммолардан чўчимаслик керак», — деган Си Цзиньпин.
Шунигдек, Си Цзиньпин коронавирус тарқалиши шароитида одамларни оммавий равишда ишдан бўшатилишига йўл қўймаслик лозимлигини таъкидлади. «Истеъмолни барқарорлаштириш, онлайн-истеъмол соҳасини ривожлантириш. Турли ташкилот ва саноат корхоналарининг қайта иш бошлашини фаоллаштириш, эпидемия таъсир кўрсатган катта корхоналарга, энг аввало, моддий ва кадрлар нуқтаи назаридан зарурий кўмак бериш, уларнинг қийинчиликларни енгиб ўтишига ёрдам қилиш керак», — дейди Си Цзиньпин.
Си Цзиньпин ҳукуматнинг барча даражадаги раҳбарлари тиббиёт ходимларига ғамхўрлик кўрсатиши, уларга муаммоларни ҳал этишда ёрдам қилиши, шифокорлар хавфсизлигини таъминлаши зарурлиги ҳақида гапирди. «Биз кўп сонли тиббиёт ходимларига ғамхўрлик қилишимиз лозим, улар танаффуссиз кун-у тун бор кучлари билан касалликка қарши кураш олиб бормоқда. Афсуски, тиббиётчилар орасида коронавирусга йўлиққанлар ҳам кам эмас, айримлар хасталик билан курашиб вафот этди», — дейилган Хитой етакчиси расмий сайтидаги баёнотда.
Япония ҳукумати коронавирус туфайли карантинга олинган Diamond Princess саёҳат кемасидаги кексалар ва сурункали касалликларга эга беморларни соҳилга эвакуация қилишни бошлади. Кема йўловчиларининг ярмидан кўпроғини ёши 70 дан ошганлар ташкил этмоқда.
Қозоғистон коронавирус сабаб Хитойдан 217 нафар фуқаросини эвакуация қилди, улар камида уч кун карантинда бўлишади. Бу ҳақда мамлакат соғлиқни сақлаш вазири Элжан Биртанов хабар берди. «Бугун эрталаб 217 киши Пекиндан Нур-Султонга қайтиб келди», — дейди вазир.
Изоҳ (0)