AQShda Milliy xokkey ligasi klublari va o‘yinchilari Xitoyda tarqalgan koronavirus sabab o‘yin klyushkalari taqchilligi muammosiga duch kelmoqda, deb yozadi Boston Globe.

Foto: Global Look Press

Ta’kidlanishicha, liga o‘yinchilarining qariyb 75 foizi Xitoydagi korxonalar tomonidan tayyorlanadigan klyushkalardan foydalanadi, biroq koronavirus tarqalishi sabab ularni muntazam yetkazib berish uzilib qolgan.

NBC Sports tahlilchisi Pyer Makguayerning so‘zlariga ko‘ra, Milliy xokkey ligasi klublarining menejerlari unga o‘tgan hafta klyushkalarning yetishmovchiligi haqida aytgan. Ishlab chiqaruvchilar ushbu xabarni rad etmoqda, ammo vaziyatdan xavotirda ekanliklarini bildirgan.

Shtab-kvartirasi Nyu-Hempshir shtatining Ekseter shahrida joylashgan Bauer kompaniyasi, shuningdek, uning asosiy raqobatchisi bo‘lgan Monrealdagi CCM kompaniyasi o‘z klyushkalarini Xitoyda ishlab chiqaradi. GearGeek.com portalining ma’lumotlariga ko‘ra, Milliy xokkey ligasining 39 foiz o‘yinchisi Bauer, 36 foizi esa CCM klyushkalaridan foydalanadi. Liganing 1,4 foiz o‘yinchisi foydalanadigan True Hockey kompaniyasi ham o‘z mahsulotini Xitoyda ishlab chiqaradi.

Mazkur muammo ta’sir ko‘rsatmaydigan yagona klyushka ishlab chiqaruvchi kompaniya bu — Meksikada joylashgan Warriror kompaniyasidir. Uning klyushkalaridan Milliy xokkey ligasining 22 foiz o‘yinchisi foydalanadi.