Норматив-ҳуқуқий ҳужжатлар муҳокамаси порталида Вазирлар Маҳкамасининг «Тошкент шаҳрида барпо этилган маданият объектларидан унумли фойдаланиш чора-тадбирлари тўғрисида»ги қарори лойиҳаси муҳокама учун жойлаштирилди.
Ҳужжат билан Маданият вазирлиги, Тошкент шаҳар ҳокимлиги, Ёзувчилар уюшмаси, Алишер Навоий номидаги Миллий кутубхонанинг Тошкент шаҳри, Шайхонтоҳур туманида Абдулла Қодирий уй-музейи ҳамда Олмазор туманида Абдулла Қодирий мемориал музейини Маданият вазирлиги тизимида ташкил этиш тўғрисидаги таклифлари маъқулланиши мумкин.
Тошкент шаҳар ва Тошкент вилояти ҳокимликлари, Алишер Навоий номидаги Миллий кутубхона, Маданият вазирлиги Давлат активларини бошқариш агентлиги билан биргаликда:
Абдулла Қодирий номидаги маданият ва истироҳат боғида кутубхона ва Абдулла Қодирий мемориал музейи учун қурилган бинони Тошкент вилояти «Турон» ахборот-кутубхона марказига оператив бошқариш ҳуқуқи асосида бепул берилишини;
Абдулла Қодирий мемориал музейи ва Тошкент вилояти «Турон» ахборот-кутубхона марказини Тошкент шаҳар, Олмазор тумани, Зарқайнар кўчаси 6-уй манзилидаги бинога жойлаштиришини таъминлайди.
Тошкент шаҳар ҳокимлиги Маданият вазирлиги билан биргаликда:
Абдулла Қодирий уй-музейини Тошкент шаҳар, Шайхонтоҳур тумани, Термиз тор кўчаси 35 ва 37-уй манзилидаги бинога жойлаштириш;
ташкил этилаётган музейларнинг асосий вазифаларидан келиб чиқиб, уларнинг низомини ишлаб чиқиш ва тасдиқлаш;
музейларнинг штатлар жадвали белгиланган тартибда ишлаб чиқилиши ва тасдиқланишини ҳамда малакали кадрлар билан тўлдирилишини таъминлаш;
Абдулла Қодирий уй-музейи жойлашган бинонинг кадастр ҳужжатларини расмийлаштириш;
музейларда маданий-маърифий тадбирлар, Абдулла Қодирий ҳаёти ва ижодига бағишланган давра суҳбатлари, ижодий учрашувлар ташкил этиш;
музейларга замонавий интерфаол ахборот-технологияларни жорий этиш чораларини кўради.
Маданият вазирлиги:
манфаатдор вазирликлар ва идоралар билан биргаликда музейлар экспозициясини музей ашёлари билан тўлдириш;
Туризмни ривожлантириш давлат қўмитаси Тошкент шаҳар ҳокимлиги билан биргаликда музейларга сайёҳларни кенг жалб этиш чораларини кўради.
Президент Администрацияси ҳузуридаги Ахборот ва оммавий коммуникациялар агентлиги Тошкент вилояти «Турон» ахборот-кутубхона марказига бино берилиши муносабати билан мазкур бинонинг кадастр ҳужжатларини расмийлаштиришни ҳамда аҳолига янада сифатли ахборот-кутубхона хизматларини кўрсатиш, жумладан, Абдулла Қодирий ҳаёти ва ижодига тааллуқли турли хилдаги адабиётлар жамланиши ва улардан самарали фойдаланишни амалга оширади.
Белгилаб қўйилишича:
Тошкент вилояти «Турон» ахборот-кутубхона марказига берилган бинони сақлаш харажатлари Тошкент вилояти маҳаллий бюджети маблағлари ва қонун ҳужжатларида тақиқланмаган бошқа манбалар ҳисобидан;
музейларга штат бирликларини ажратиш ҳамда ходимларига иш ҳақи тўлаш Маданият вазирлиги тизимидаги музейлар учун белгиланган тартибга мувофиқ;
музейларни сақлаш харажатлари Тошкент шаҳар маҳаллий бюджети маблағлари, музейларнинг ўз даромадлари ва қонун ҳужжатларида тақиқланмаган бошқа манбалар ҳисобидан амалга оширилади.
Изоҳ (0)