Шавкат Мирзиёев 2019 йилнинг декабрида «Ўзбекистон Миллий ахборот агентлиги фаолиятини янада такомиллаштириш чора-тадбирлари тўғрисида»ги қарорни имзолаган эди.
Унда ЎзАнинг асосий вазифалари ва фаолиятининг устувор йўналишлари белгиланган, шунингдек, агентлик таркибида Медиа марказ ташкил этилиши таъкидланганди.
Медиа марказнинг асосий вазифаларидан бири ахборот-таҳлилий ва мультимедиа материаллар, эшиттириш ва кўрсатувлар тайёрлаш, уларни ЎзАнинг веб-сайтига жойлаштириш ва оммавий ахборот воситаларига белгиланган тартибда етказиб беришдан иборат.
Қарорга кўра, 2020 йил 1 майга қадар фойдаланувчилар учун қулай, аудио ва видео ахборотларни тарқатиш, тарқатилаётган ахборотларни тижорат йўли билан юклаб олиш имкониятлари мавжуд бўлган ЎзАнинг ахборот портали ишга туширилади.
Куни кеча агентлик ушбу ахборот порталини яратиш ва унга зарур техникаларни сотиб олиш учун 5,4 миллиард сўм ажратилиши кўзда тутилган Вазирлар Маҳкамаси фармойишини муҳокамага қўйди.
Пуллар давлат бюджетининг 2020 йил 1-чорак якуни бўйича даромадлар режасининг орттириб бажарилган қисми ҳисобидан олиниши қайд этилган.
Ускуналарни тендер танловлари орқали сотиб олиш режалаштирилган. Пул агентлик бош директори шахсий жавобгарлиги остида ажратилади.
Изоҳ (0)