Россия Тожикистон фуқароларини Хитойдан эвакуация қилишга ёрдам беришни ваъда қилди

Россия Тожикистоннинг ўз фуқароларини Хитойнинг коронавирус тарқалган ҳудудларидан эвакуация қилиш бўйича илтимосини бажара олмади. Бу ҳақда «Коммерсантъ» хабар берди.

Аввалроқ, Тожикистоннинг Россиядаги элчиси Имомуддин Сатторов берган маълумотга кўра, Тожикистон ҳукумати Россия Ташқи ишлар вазирлиги ва ҳукуматига Хитойнинг Хубэй провинциясидан тожикистонликларни эвакуация қилиш бўйича ёрдам сўраб мурожаат қилган. Россия томонидан бунга розилик берган.

Бироқ кейинчалик маълум бўлишича, Хитойнинг турли шаҳарларидан россияликларни эвакуация қилган Россия ҳаво-космик кучларининг иккита рейсига Тожикистон фуқаролари олинмаган. Бунга Хитойдан эвакуация қилинган россияликлар жойлаштирилган Тюмень вилоятида етарлича изоляторлар мавжуд эмаслиги сабаб бўлган. Россия ҳукумати икки ҳафтадан кейин, изоляторлар бўшаганда ва Хитойдан россияликларнинг кейинги эвакуацияси амалга оширилганда, Тожикистон фуқаролари ҳам эвакуация қилинишини ваъда қилган.

Эслатиб ўтамиз, Ўзбекистон ўз фуқароларини Хитойдан эвакуация қилиш бўйича иккита чартер рейсини амалга оширди. Уларнинг биринчиси 4 февраль куни амалга оширилди ва Пекин шаҳридан 250 нафар ўзбекистонлик олиб келинди. Санитария-эпидемиологик осойишталик агентлиги ушбу фуқароларда коронавирус аниқланмаганини маълум қилди. 5 февраль куни 84 нафар йўловчидан 79 нафари Ўзбекистон, 5 нафари Қозоғистон фуқаросиҳисобланади. Улар Тошкент шаҳри ва Тошкент вилоятида ташкил қилинган махсус муассасаларга жойлаштирилди ва у ерда икки ҳафта давомида назорат остида бўлади. Кейинчалик маълум бўлишича, эвакуация қилинган ўзбекистонликлар орасида беш нафар Қозоғистон фуқароси ҳам бўлган. Шунингдек, яқин вақт ичида яна 260 нафар ўзбекистонлик чартер рейси билан Пекиндан олиб келишини кутилмоқда.

Аввалроқ, тожикистонлик талабалар Тошкент орқали ўз юртига қайтаётгани ҳақидаги хабар берилган эди.