Xitoyning Xubey provinsiyasida tarqalgan koronavirus sabab yuzaga kelgan cheklovlar fonida Tojikiston o‘zining Uxandagi fuqarolarini evakuatsiya qilmaydi. Bu haqda mamlakat Tashqi ishlar vazirligiga tayanib “Asia-Plus” xabar berdi.

Foto: EADaily

Ta’kidlanishicha, “Xubey provinsiyasidan tojik talabalarini ekakuatsiya qilish zarurati tug‘ilganda, Tojikiston tomoni Xitoy hukumati bilan hamkorlikda buni amalga oshiradi”.

Eslatib o‘tamiz, aydim davlatlar Xitoydan o‘z fuqarolarini evakuatsiya qilishni boshlagan. Xususan, Avstraliya Uxandagi fuqarolarini Rojdestvo oroliga ko‘chirishga qaror qilgan bo‘lsa, Yaponiya ham 200 nafarga yaqin fuqarosini evakuatsiya qilishini ma’lum qilgan.

Tojikistonning Xitoydagi elchixonasi ma’lumotlariga ko‘ra, hozirda Xitoyda 3500 yaqin tojik talabalari tahsil olmoqda, ularning 50 nafari karantinga yopilgan Uxan shahrida.

Chendu shahridagi tojik talabalaridan birining ma’lum qilishicha, 31-yanvaar kuni jami yetti nafar Tojikiston fuqarosi Toshkentga uchib keladi. Chendu shahri yopilmagan.

Tojikistonning Xitoydagi elchixona maslahatchisi Shuhrat Sobirzodaning so‘zlariga ko‘ra, hozirda Xitoyning boshqa shaharlariga borish taqiqlanmgan. Fuqarolar hech qanday cheklovsiz mamlakatni tark etishlari mumkin.

Eslatib o‘tamiz, hozirda Xitoyning koronavirus tarqalgan murakkab epidemik vaziyat hukm surayotgan hududida 72 nafar o‘zbekistonlik talaba mavjud.

O‘zbekiston Tashqi ishlar vazirligi fuqarolarga Xitoyga xizmat, turistik va boshqa maqsadlarda tashrif buyurishdan tiyilib turishni tavsiya qilmoqda.