Airbus компанияси 5 февраль, чоршанба куни, Хитойдаги заводини ёпди. Бу ҳақда «Коммерсантъ» хабар берди. Компания томонидан маълум қилинишича, Тянцзиндаги заводнинг иши қайта бошланмасликка қарор қилинган. Компаниянинг офисда ишловчи ходимлари эса ўз ишларини Хитой ҳукумати талабига мувофиқ уйларидан давом эттиради.
Тянцзиндаги завод бир ойда олтитагача А320 самолётини ишлаб чиқаради. Бу компаниянинг бир йилда ишлаб чиқариладиган барча кичик фюзеляжли самолётларининг тахминан 10 фоизини ташкил қилади. Заводнинг ёпилиши компания учун оғриқли бўлади, чунки бу компания кичик фюзеляжли самолётларга бўлган талабни қондириш учун барча имкониятларини ишга солишга уринаётган бир вақтда юз бермоқда. Аввалроқ компания раҳбари Гийом Фори кичик фюзеляжли самолётларни ишлаб чиқариш билан боғлиқ вазиятни 2021 йилдагина барқарорлаштириш мумкинлигини маълум қилган.
Кейинги ҳафтага қадар Чжоушандаги Boeing компаниясининг заводи ҳамда Франциянинг Safran компаниясига қарашли самолётлар учун двигателлар ишлаб чиқарувчи завод ёпилади.
Аввалроқ Хитойда ўз ишини тўхтатиш ҳақида General Motors, Toyota, Volkswagen автомобиль ишлаб чиқарувчилари маълум қилган эди. Ўз навбатида, Hyundai компанияси Жанубий Корея ҳудудидаги еттита заводини ёпишга мажбур бўлди. Бу компаниянинг дунё бўйича ишлаб чиқариш қувватларининг 40 фоизини ташкил қилади. Мазкур заводлар ишининг тўхташига коронавирус сабабли Хитойдан етказиб бериладиган бутловчи қисмларнинг етишмаслиги сабаб бўлган.
Аввалроқ Apple, Huawei, Xiaomi ва Lenovo коронавирус туфайли Россияга смартфонлар етказилишини кечиктиргани хабар қилинган эди. Apple эса Хитойдаги дўконларини ёпди. Шунингдек, Google компанияси ҳам Хитойдаги офисларини вақтинча ёпишга қарор қилган.
Изоҳ (0)