«2019-nCoV вирусига қарши таъсир кўрсата оладиган дори воситалари ҳозирча мавжуд эмас, лекин касалликка чалинганларнинг кўп қисми ундан вафот этмайди, улар муолажалар ёрдамида шифо топади», – дея таъкидлаган ЖССТнинг фақулодда дастурлар бўйича ижрочи директори Майкл Райан. Бу ҳақда «РИА Новости» хабар берди.
«Янги коронавирусга қарши кураша оладиган тасдиқланган, самарали дори воситалари йўқ. Эпидемия юқиши ва тарқалишига қаралса, унинг асосан иммунитети паст ёши катта одамларнинг ўлимига сабаб бўлаётгани англашилади. Беморларнинг аксар қисми вирус таъсиридан эмас, балки ички органларнинг ишлашдан тўхтаб қолиши оқибатида ёки вирус туфайли юзага келган талваса сабаб вафот этган. Шу сабабли беморларнинг асосий қисми ҳар томонлама тўғри даволанса омон қолиши мумкин», – деган Райан.
Унинг сўзларига кўра, янги вирусдан даволанишда ОИВ ёки аввалги тожвируслардан соғайишда самара берган дори воситалари наф бериши ҳали ўз исботини топмаган. Лекин Хитой сертификацияга эга ушбу дорилардан, хусусан Интерферон ва ингибиторлардан 2019-nCoV’га қарши курашдан фойдалана олади. ЖССТ мамлакатни ушбу дорилар билан боғлиқ тадқиқотлар натижалари ҳақида маълумот бериб боришга чақирди.
Хитой ҳукумати 2019 йил 31 декабрда Жаҳон соғлиқни сақлаш ташкилотига Хубэй вилоятининг Ухань шаҳрида номаълум вирус тарқалганини билдирган. Мутахассислар касалликни 2019-nCoV коронавируси келтириб чиқараётганини аниқлаган. Хитойнинг материкли қисмида касаллик билан зарарланганлар сони 24,3 минг нафардан ошган, 490 нафар одам вафот этган, Гонконгда ҳам битта одамнинг ўлгани хабар қилинган. Хитойдан ташқарида 170 дан ортиқ одам коронавирусга чалинган. ЖССТ коронавирусни халқаро миқёсидаги фавқулодда ҳолат деб тан олган.
Изоҳ (0)