Сирдарёда маст йўловчи ЙПХ ходимларини уриб, жароҳат етказди
20 январь, душанба куни Сирдарё вилояти Сирдарё шаҳрида туман ИИБ ЙҲХБ ЙПХГ катта инспекторлари Э.Пармонов, С.Файзиев ҳамда ЙПХ ходими Ф.Алимбаев мастлик ҳолатини аниқлаш бўйича рейд олиб бораётган бўлган, деб хабар беради Ички ишлар вазирлиги Йўл ҳаракати хавфсизлиги Бош бошқармаси матбуот хизмати.
Қашқадарё вилояти Миришкор туманида яшовчи Жамолиддин Ҳамроев Nexia автомобилини ҳужжатларсиз бошқариб, ЙПХ инспекторининг тўхташ ишорасига бўйсунмасдан ҳаракатни давом эттирган.
Шундан сўнг, ЙПХ катта инспектори Э.Пармонов ЙПХ инспекторлари С.Файзиев ва Ф.Алимбаев билан биргаликда Nexia автомобилини кузатиб боришган. Улар тўхташ ишорасига бўйсунмасдан ҳаракатланган транспорт воситасини Сирдарё шаҳар «Янги ҳаёт» маҳалласида тўхтатиб, ҳайдовчидан ҳужжатларни тақдим этишини сўраган.
Ҳайдовчи Ж.Ҳамроев бошқариш ҳуқуқини берувчи ҳужжатлари йўқлигини маълум қилган вақтида Nexia автомобили йўловчиси 1996 йилда туғилган Жаҳонгир Панжиев тиззаси билан хизмат вазифасини бажараётган ЙПХ инспектори Э.Пармоновнинг қорин қисмига тепиб, кўкрак нишонини юлиб олган.
Шунингдек, ЙПХ инспектори сержант С.Файзиев фуқаро Ж.Панжиевни тинчлантирмоқчи бўлган вақтида унга ҳам фаол қаршилик кўрсатиб, унинг ҳам кўкрак нишонини юлиб олиб, бармоғини қайириб синдирган. ЙПХ инспекторлари фуқаролар Ж.Панжиев ва Ж.Ҳамроевнинг шахсига аниқлик киритиш ва қонуний чора кўриш мақсадида Сирдарё тумани ИИБга олиб келган вақтида фуқаро Ж.Панжиев ўзининг ҳуқуқбузарлигини яна давом эттириб, Ф.Алимбоевнинг юз қисмига бир маротаба калласи билан уриб, тан жароҳати етказган.
Фуқаро Ж.Панжиевни алкотестор кўригидан ўтказилганда, маст эканлиги аниқланган.
Ҳозирда бодикамералар хотиралари текширилиб, Сирдарё туман прокуратураси томонидан терговга қадар суриштирув ишлари олиб борилмоқда.
