Toshkent shahrida Starbucks qahvaxonalar tarmog‘i ochilishi mumkin. Mazkur masala Toshkent shahar hokimi Jahongir Ortiqxo‘jayev va Alshaya Group kompaniyasining mintaqaviy vakili Nenji Menxotra o‘rtasida bo‘lib o‘tgan uchrashuvda muhokama qilindi. Bu haqda Toshkent shahar hokimligi xabar berdi.
Ma’lum qilinishicha, uchrashuv davomida tomonlar o‘zaro hamkorlik masalalarini, xususan, Toshkentda jahonga mashhur Starbucks qahvaxonalari tarmog‘ini ochish istiqbollarini muhokama qildi.
Kompaniyaning mintaqaviy vakili Nenji Menxotra Toshkent shahri hududida 4 va 5 yulduzli mehmonxonalarni qurish loyihasiga ham katta qiziqish bildirdi.
Qayd etilishicha, Alshaya Group yaqin besh yilga mo‘ljallangan demografik o‘sish ko‘rsatkichlariga asoslanib, shahar infratuzilmasi va kommunikatsiyalarini rivojlantirish masalasiga ham to‘xtalib o‘tdi.
Uchrashuv natijalariga ko‘ra, kompaniya vakili Starbucks qahvaxonalari tarmog‘i va mehmonxonalarni ochish loyihasini amalga oshirish uchun zaruriy hujjatlarni tayyorlashi haqida ma’lumot berdi.
Ma’lumot uchun
Alshaya Group chakana franshizaning yetakchi xalqaro operatori bo‘lib, Yaqin Sharq va Shimoliy Afrika, Rossiya, Turkiya va Yevropada 90 ta iste’mol brendiga hamda ko‘chmas mulk, qurilish, mehmonxonalar, avtomobil va umumiy savdo sohasida xoldinglarga egalik qiladi. Kompaniyaning bosh ofisi Kuvayt shahrida joylashgan.
Izoh (0)