Тошкент вилояти Юқоричирчиқ туманида 9 январь куни икки ҳамкасб ўртасидаги жанжал пичоқбозлик билан тугади. Бу ҳақда Ўзбекистон Ички ишлар вазирлиги ҳузуридаги Тергов департаменти хабар берди.
Маълум қилинишича, 2020 йил 9 январь куни соат 02:25 да муқаддам судланган 23 ёшли Х.У. қўшма корхонада ўзи билан бирга ишлаб келаётган таниши 25 ёшли Ш.Н. билан тортишиб қолган ва улар ўртасида жанжал келиб чиққан. Келишмовчилик оқибатида Х.У. дала майдонида ўзининг ёнида бўлган пичоқ билан Ш.Н. танасининг кўкрак қафаси орқа юзасига бир неча маротаба зарба бериб тан жароҳати етказган.
Дастлабки тиббий маълумотномага кўра Ш.Н.нинг танасида чап томон кўкрак қафасига тешиб кирган жароҳат борлиги кўрсатилган.
Мазкур ҳолат юзасидан Юқоричирчиқ тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган.
Изоҳ (0)