2020 йил 13 январь куни олтинчи чақириқ Халқ депутатлари Фарғона вилояти кенгашининг биринчи сессияси бўлиб ўтди. Унга 57-Ҳамид Олимжон сайлов округидан сайланган депутат Топиволди Холдоров раислик қилди. Бу ҳақда вилоят ҳокимлиги ахборот хизмати хабар берди.
Сессия ишида вилоят кенгаши депутатлари, вилоят ҳокимининг ўринбосарлари, вилоят ҳокимлигининг бошқарма ва бўлимлари раҳбарлари, шаҳар ва туман ҳокимлари, ҳуқуқни муҳофаза қилувчи органлар раҳбарлари ҳамда оммавий ахборот воситалари вакиллари қатнашди.
Шунингдек, сессияда Ўзбекистон Республикаси Президенти вакили, Бош вазирнинг биринчи ўринбосари Очилбой Раматов иштирок этди.
Дастлаб Халқ депутатлари Фарғона вилояти кенгашига ўтказилган сайлов натижалари ҳақида ахборот бериш учун вилоят сайлов комиссияси раиси Эркин Нуралиев сўз олди. У 60 нафар сайланган депутат мақомини тасдиқлади.
Халқ депутатлари Фарғона вилояти кенгашининг 7 та доимий комиссияси тузилди.
Кун тартибидаги ташкилий масала – Ўзбекистон Республикаси Президенти томонидан Фарғона вилояти ҳокими лавозимига тақдим этилган номзодни тасдиқлаш юзасидан Очилбой Раматов сўзга чиқди.
У Ўзбекистон Республикаси Президенти томонидан Фарғона вилояти ҳокими лавозимига 2-Мирзо Улуғбек сайлов округидан сайланган депутат Шуҳрат Ғаниев номзодини Халқ депутатлари вилоят кенгаши сессиясида тасдиқлаш тўғрисида тақдимнома киритилганлигини билдирди ва ўқиб эшиттирди.
Ушбу тақдимнома муҳокамасида депутатлик гуруҳлари вакиллари сўзга чиқди ва Фарғона вилояти ҳокимлигига тавсия этилган номзодни қўллаб-қувватлади. Шуҳрат Ғаниев Фарғона вилояти ҳокими этиб бир овоздан тасдиқланди.
Ш.Ғаниев билдирилган юксак ишонч учун Ўзбекистон Президенти ва Халқ депутатлари Фарғона вилояти кенгаши депутатларига миннатдорлик билдирди. Бор куч ва билимини сафарбар қилиб, фидойилик ва садоқат билан хизмат қилишга ваъда берди.
Изоҳ (0)