Жиззах вилоятининг Мирзачўл туманидаги Гагарин шаҳрида яшовчи аҳоли 2018 йил харид қилинган кўп қаватли уйлар деворида ёриқ пайдо бўлганидан, девор ёриқлари кун сайин катталашаётганидан хавотирда. Бу ҳақда «Дарё»га журналист Аъзам Хўжақулов хабар беряпти.
Маълум қилинишича, Жиззах вилоятининг Мирзачўл тумани маркази Гагарин шаҳри 2018 йил Президент ташаббуси билан бутунлай янги қиёфа касб этган. Бир-биридан чиройли бинолар қад ростлаб, одамларга беқиёс қулайликлар яратилган.
Шаҳардаги мавжуд барак уйлар бузилиб, ўрнида замонавий қиёфадаги кўп қаватли уйлар қурилган. Нафақат барак уй эгаларига, балки бошқа харидорларга ҳам сотилган. Аҳоли ўша пайт барча қулайликларга эга арзон ва шинам уйларга кўчиб кирганидан қувонган бўлса, бугун девор ёрилишидан қўрқиб яшамоқда.
— 2018 йил шаҳарнинг Ўзбекистон шоҳ кўчаси бўйлаб қурилган янги кўп қаватли уйларда катта-катта ёриқлар пайдо бўла бошлаган, — дейди 1-уй 12-хонадон эгаси Зейнаб Жунусбекова. – Девор кун сайин катталашяпти.Маълум бўлишича, 1-уйнинг 10 ва 12-хонадонидаги ёриқлар нафақат шу хонадон аъзоларини, балки бутун бошли уйда яшовчиларнинг юрак ҳовучлаб яшашига сабаб бўлмоқда.
— Кундан кунга ёриқлар ҳам хавотирларимиз ҳам катталашмоқда, — дейди аҳоли. — Ишонамизки, қурилишга масъуллар бизнинг эътирозларимизни эътиборсиз қолдиришмайди.
Изоҳ (0)