Jizzax viloyatining Mirzacho‘l tumanidagi Gagarin shahrida yashovchi aholi 2018-yil xarid qilingan ko‘p qavatli uylar devorida yoriq paydo bo‘lganidan, devor yoriqlari kun sayin kattalashayotganidan xavotirda. Bu haqda “Daryo”ga jurnalist A’zam Xo‘jaqulov xabar beryapti.
Ma’lum qilinishicha, Jizzax viloyatining Mirzacho‘l tumani markazi Gagarin shahri 2018-yil Prezident tashabbusi bilan butunlay yangi qiyofa kasb etgan. Bir-biridan chiroyli binolar qad rostlab, odamlarga beqiyos qulayliklar yaratilgan.
Shahardagi mavjud barak uylar buzilib, o‘rnida zamonaviy qiyofadagi ko‘p qavatli uylar qurilgan. Nafaqat barak uy egalariga, balki boshqa xaridorlarga ham sotilgan. Aholi o‘sha payt barcha qulayliklarga ega arzon va shinam uylarga ko‘chib kirganidan quvongan bo‘lsa, bugun devor yorilishidan qo‘rqib yashamoqda.
— 2018-yil shaharning O‘zbekiston shoh ko‘chasi bo‘ylab qurilgan yangi ko‘p qavatli uylarda katta-katta yoriqlar paydo bo‘la boshlagan, — deydi 1-uy 12-xonadon egasi Zeynab Junusbekova. – Devor kun sayin kattalashyapti.Ma’lum bo‘lishicha, 1-uyning 10 va 12-xonadonidagi yoriqlar nafaqat shu xonadon a’zolarini, balki butun boshli uyda yashovchilarning yurak hovuchlab yashashiga sabab bo‘lmoqda.
— Kundan kunga yoriqlar ham xavotirlarimiz ham kattalashmoqda, — deydi aholi. — Ishonamizki, qurilishga mas’ullar bizning e’tirozlarimizni e’tiborsiz qoldirishmaydi.
Izoh (0)