Тошкент вилоятида ўтган йилнинг декабрь ойида ўз фаолиятини бошлаган «Амирсой» тоғ-чанғи курортида 7 январь куни чанғичи вафот этди. Бу ҳақда «Амирсой»нинг Facebook’даги саҳифасида маълум қилинди.
Хабар берилишича, 7 январь куни соат 16:20 да, «Amirsoy Resort» чанғи трассалари ёпилишидан олдин ташриф буюрувчилардан бири курорт ходимларига ёш чанғичи йўқолиб қолганини маълум қилган.
Мазкур маълумот олинганидан сўнг курортнинг қутқарувчилар жамоаси зудлик билан йўқолган чанғичини қидиришни бошлаган. 30 дақиқадан сўнг чанғичи қутқарув хизмати ходимлари томонидан чанғи трассаларидан ташқарида ҳаёт белгиларисиз топилган.
Курортнинг саккиз нафар қутқарувчиси ва икки нафар шифокор 50 дақиқа давомида жабрланган чанғичини жонлантиришга уринган. Бироқ уринишлар самара бермаган.
Хабар сўнгида «Amirsoy Resort» вафот этган чанғичининг оиласи ва яқинларига ҳамдардлик билдирган.
Хабарда вафот этган кишининг шахси ва ёшига аниқлик киритилмаган.
Изоҳ (0)