Вилоятда талаб юқори бўлган ва мутахассислар етишмаётган йўналишлар бўйича республика олийгоҳларида таълим олаётган 100 нафар талабанинг шартнома пули маҳаллий бюджет ҳисобидан, чет элда аниқ фанлар йўналишида ўқиётган 10 нафар талабанинг контракти эса ҳокимлик захирасидан тўлаб берилади. Бу ҳақда Наманган вилояти ҳокими Хайрулло Бозоров маълум қилди, дея хабар беради «Дарё» мухбири Азизбек Абдувалиев.
Бундай имтиёз тақдим этилган ёшлар билан ўқишни тамомлагач вилоят ҳудудида ва ўз соҳасида 5 йил ишлаб бериш юзасидан шартнома имзоланади.
Норин туманида ёшлар вакиллари билан учрашган Хайрулло Бозоров 2020 йилдан бошлаб вилоятда ҳаётга татбиқ этиладиган ёшлар масалаларига оид янги дастурни эълон қилди.
Унга кўра, вилоят ёшлари ўзларини қизиқтирган масалалар, таклифлар ҳамда муаммоларни юборишлари учун вилоят ҳокимлиги қошида «Ёшлар мурожаати» веб-сайти ташкил этилади. Шунингдек, мурожаатларни тезкор тарзда қабул қилиш учун вилоят ҳокимлигида Call-center фаолияти йўлга қўйилади.
Вилоятда ёшларнинг малакали касб эгаллаши учун Япония, Жанубий Корея ва Ҳиндистон билан ҳамкорликда касб-ҳунар ва замонавий тил ўргатиш марказлари ташкил этилади. Ушбу марказлар яқин вақт мобайнида ишга туширилади.
Халқаро фан олимпиадалари ғолибларини муносиб тақдирлаш йўлга қўйилади. Тан олинган халқаро олимпиадаларда биринчи ўринни қўлга киритганларга Nexia, иккинчи ўрин эгаларига Spark, учинчи ўрин соҳибларига Damas автомобиллари тақдим этилади.
Мактаб ўқувчилари ўртасида «Ўзбекистон тарихи» кўрик-танлови ташкил этилади. Ғолиб ўқувчилар мамлакатнинг қадимий шаҳарлари бўйлаб барча харажатлари тўлиқ қопланган бепул саёҳат билан тақдирланади. Ҳар йили 10 нафар энг фаол вилоят ёшлари «Артек» халқаро дам олиш масканига бепул юборилади.
Ҳар бир вилоят ташкилоти ва бошқармаси вилоят ва туманлар кесимида ёш раҳбар ёки раҳбар ўринбосарларини тайинлаши кўзда тутилмоқда. Наманган вилояти бўйича 100 нафар ёш раҳбарлик лавозимига тайинланади.
Вилоятдаги корхона-ташкилотлар, йирик ишлаб чиқариш ва хизмат кўрсатувчи субъектларда умумий миқдори 1000 тадан иборат квотали иш ўринлари яратилади. Йирик саноат корхоналари ва тадбиркорлик субъектлари ўзлари учун керакли йўналишларда бир нафардан ёшни ўқитиш учун чет элга юборишлари бўйича келишув имзоланади.
Наманган шаҳридаги «Ёшлар маркази» қошида замонавий қурилмалар билан жиҳозланган «Ёшлар медиа маркази»ташкил этилади. Вилоят телевидениесида эса «Ёшлар соати» дастури ташкилланади ва унда ёшлар билан боғлиқ долзарб масалалар ҳокимлар иштирокида муҳокама қилинади.
Чет элда ўқиб, ишлаётган наманганлик ёшлар иштирокида «Хориждаги наманганликлар» клуби ташкил этилади. Бунинг учун ижтимоий тармоқда оммалашган «Наманганликлар» каналида махсус саҳифалар очилади.
— Ҳар бир туманда маҳаллий бюджет маблағлари ҳисобидан янги спорт мажмуалари қурилади. Наманган шаҳри ва туман марказларида аҳоли гавжуд бўладиган ҳудудларда бепул Wi-Fi зоналари ташкил этилади. Барча ташкилот ва идоралар биноларида ҳам шундай бепул тармоқлар ишга туширилади. Шунингдек, вилоят ёшлари ўртасида киберспорт бўйича вилоят очиқ чемпионати ўтказилиши ҳам режа қилинган, — деди Хайрулло Бозоров.
Ҳар йили вилоят ёшлари ўртасида мақом, опера, эстрада қўшиқчилик йўналишларида «Afsona music» ёш талантлар очиқ кўрик-танлови ўтказиш йўлга қўйилади. «Афсоналар водийси» боғидаги 2400 кишилик амфитеатр ушбу танловнинг ўтказиш ўрни сифатида белгиланди.
Видеоконференция тарзида барча туман ва шаҳар ёшлари вакиллари иштирок этган учрашувга улар билан бевосита мулоқот якун ясади.
Изоҳ (0)