Ўтаётган ҳафтада дунё матбуотида қандай воқеалар муҳокамаларга сабаб бўлди, қандай сиёсий ва ижтимоий мавзулар дунё таблоидларининг бош саҳифасидан ўрин олди — «Daryo.uz»нинг ҳафталик дайжести айнан шуларга тўхталиб ўтади.
Гитлернинг мўйлови — ёвузлик тимсоли
Der Spiegel нашрининг ёзишича, Гитлер қўйиб юрган чўткача мўйлаб ёвузлик тимсоли бўлиб қолди. Гитлер қандай қилиб шу модада тўхтаган?
Журналист Гвида Кляйнхуббертнинг таъкидлашича, гитлерча мўйлов қўйганлар дарҳол нацистларга хайрихоҳ эканликда шубҳа уйғотади. Гитлерча мўйлов сиёсатчиларни обрўсизлантиришнинг ҳам бир усули бўлиб қолди. Масалан, Европада молиявий инқироз авж нуқтасига чиққан пайтда италян ва грек газета-журналларида Ангела Меркелнинг гитлерча мўйлов қўйилган карикатуралари кўпайиб кетганди.
Маданиятшунос Фридрих Титеннинг қайд этишича, Гитлер таниқли бўлиши устида кўп бош қотирган. Гитлернинг Биринчи жаҳон уруши пайтида тушган суратларида тўртбурчак билан эмас, кенг мўйловлар билан кўринади.
Урушдан кейинги 20-йилларда унинг аниқ расми бўлмаган. Аниқроғи, 1923 йилдан кейин Гитлернинг ҳаммага маълум чўткача мўйловдаги қиёфаси пайдо бўлган. У вақтда бундай мўйлов урф бўлмай, ҳаттоки танқид ҳам қилинар эди. Аммо Гитлер бунга парво қилмаган.
Кайзер Вильгельм услубидаги ёки бошқача буралган мўйловлар Гитлерга мос келмас эди. Бош нацистга қатъийроқ, кескинроқ тус берадиган услуб керак эди.
Гитлер ҳокимият тепасига келгач, унга тақлид қилувчилар кўпайиб бораверган. Гитлерча мўйлов фюрернинг тимсолига айланган, образ бўлиб қолган.
Иккинчи жаҳон урушидан сўнг бундай мўйловлар Адольф исми каби урфдан чиқди, ғойиб бўлди. Бу мўйлов Германияда ҳаттоки компьютер ўйинларидан ҳам олиб ташланди. 2017 йилда Wolfenstein 2 ўйинида диктатор мўйловсиз қиёфада намоён этилди.
Мўйлов свастика каби энг машҳур белгига айландики, унга қараб ҳаттоки ҳайвонларни ҳам нацистларникидек деб баҳолаш мумкин.
«Гитлер ўлди, аммо унинг мўйлови тирик», — деб таъкидлайди Титен.
Дональд Трамп Россия билан тил бириктирмаган
The Washington Post газетаси Трамп Россия билан тил бириктирмаган, лекин у Мюллер мени оқлади деб адашяпти, деган мазмунда мақола чоп этди.
Махсус прокурор Роберт Мюллер икки йиллик тергов-суриштирув ишларидан сўнг Трампнинг Россия билан битим тузгани асоссиз эканлиги ҳақидаги маълумотни эълон қилган. Ўша пайтда Калифорнияда бўлган Трамп Мюллер ҳисоботини ғалаба сифатида кутиб олди.
Аммо Конгрессдаги демократлар баёнотнинг иккинчи қисми, яъни Трамп ва унинг штаби аъзолари рус томонининг вакиллари билан музокара бўлиб ўтгани аниқ эмаслиги ва Трамп ҳуқуқни муҳофаза қилиш идораларига босим ўтказгани масаласида шубҳа билдириб, адлия вазирлигининг юқори мансабдорларини сўроқ учун чақиришларини билдиришди.
Трамп айни пайтда асосий айбловлардан қутулгандай, аммо демократлар курашни давом эттирмоқчи.
Сайлов кампанияси яқинлашгани сари АҚШ сиёсий ҳаётида қизиқ воқеалар бўлишини кутсак бўлаверади.
Янги президентлик сайловларида Трампга қарши курашиш учун жиддий рақиблар тайёргарлик кўрмоқда. Трамп эса иккинчи марта ҳам президентлик сайловида ғалаба қилмоқчи.
Қироллик оиласи фарзандларига исм қандай танланади?
The Independent нашрининг ёзишича, шаҳзода Гарри ва герцогиня Меган Сассекслар баҳорда фарзанд кўради. Ҳозирда Туманли Альбионда барчанинг оғзида гўдакка қандай исм қўйилиши борасидаги муҳокамалар кенг урчиган.
Британияда қироллик оиласида болага фарзанд қўйишда муайян анъаналарга асосланилади. Шажарага кўра энг кўп қўйиладиган исм ўғил болалар учун Альберт, қизлар учун Виктория. 1819 йилда туғилган қиролича Викториядан сўнг қироллик оиласида 12 та Альберт ва тўққизта Виктория дунёга келган.
Британияда гўдакка қандай исм қўйилиши борасида ҳаттоки букмекерлар ставка қабул қилмоқда. Skybet букмекерлик сайтидан маълум бўлишича, гўдакка Виктория, Изабелла ёки Жеймс деб исм қўйилиши борасидаги гаровлар ўнга бир бўлиб турибди экан. Диана исми тарафдорлари эса 12:1 нисбатда гаровга пул тикиб қўйган.
Герцог ва герцогиня Сассекслар фарзандларига исм қўйишда қироличанинг фикрига ҳам қулоқ солади, албатта.
Европа: қудратлими, қурбонми?
The New York Times нашри «Европа қудратлими ёки қурбонми?» сарлавҳали мақола чоп этди. Мақолада айтилишича, Путин Россияси, Си Цзиньпин раҳбарлиги остидаги Хитой ва Трамп Америкаси Европага босим ўтказмоқда. Уч тарафлама турли мақсадларда сиқувга олинаётган Европанинг ўзида турли оқимлар ўртасида кураш борки, бу Европанинг келажагига катта таъсир кўрсатиши тайин. Европа ё уч қудратли давлат ўртасида ўлжага айланиши, ёки қудратини сақлаб қолиши мумкин.
Россия Европага нисбатан қандай ўйин олиб бораётгани маълум, қолаверса, кейинги икки йил ичида у Австрия, Италия ва Нидерландияда ўз иқтисодий фаолиятини янада кенгайтирди. Россиянинг мақсади Европа Иттифоқининг бирлигини заифлаштиришдир.
Хитой эса масалага бошқача ёндашмоқда. Янги Ипак йўли ғояси остида у Европани ўзига боғлаб олмоқчи. Ана шу мақсадда Пекин Европа жанубий дарвозаларини очмоқда. Шу мақсадда Афинада порт ҳам сотиб олди. Сининг Франция ва Италияга олти кунлик ташрифи Европанинг кучи ва бойлигини текшириб кўришдан иборат.
Европанинг асосий иттифоқчиси бўлган АҚШнинг Хитой билан ўз «урушлари» аввало савдо соҳасида, сўнгра технология соҳасида давом этмоқда. Бу эса Европанинг иқтисодий ўсишини секинлаштирмоқда. Трамп маъмурияти Европага гоҳ рақиб, гоҳ вассал сифатида қарамоқда. Бирорта ҳафта Трампнинг Европага дўқ ва пўписаларисиз ўтмаяпти. Масалан, Эрон ядро битими, Суриядан АҚШ қўшинларини олиб чиқиш борасидаги масалаларда Европа манфаатлари назар-писанд қилинмади. Европага турли хил оҳангдаги буйруқлар юбориляпти.
Европа иқтисодий ва сиёсий жиҳатдан бирлашмоғи керак. Бунинг учун Европа Иттифоқига кирган 28 давлат яхлит ҳаракат қилмоғи, ўзаро келишмовчиликларни бартараф қилиши зарур. Европа олдида турган муаммоларни бартараф қила олармикин? Кузатиб борамиз.
Изоҳ (0)