“Daryo” jahon matbuotida oxirgi kunlarda ko‘tarilgan asosiy mavzularga to‘xtalib o‘tadi.

AQSh – Rossiya munosabatlari yaxshilanmaydi

Rus oligarxi va Putinning yaqinlaridan biri Deripaska CNBC kanaliga bergan intervyusida “hozirgi avlod vaqtida Rossiya – AQSh munosabatlarini yaxshilashning iloji yo‘q”, — deb aytdi.

Rus milliarderi Oleg Deripaska. Foto: CNBC

Deripaska AQSh moliya vazirligini sudga berib, unga qarshi kiritilgan jazo choralari tufayli, uning boyligi 81 foizga yoki 7,5 milliard dollarga kamayganini iddao qildi.

Deripaska CNBC kanaliga bergan intervyusida har ikki tomon mudofaa uchun trilionlab dollar sarflashga tayyor, lekin uning yarmiga ehtiyoj yo‘q, deb aytgan. “Keyingi yil AQSh prezidentining o‘zgarishi Vashinton va Moskva o‘rtasidagi munosabatlar, biroz bo‘lsa-da, yaxshilanishi mumkinmi?”, degan savoliga “Siz jiddiy so‘rayapsizmi?” deb javob qaytargan.

“To‘rt yildan keyin ham hozirgi siyosiy vaziyat qanday bo‘lsa, ikki davlat o‘rtasidagi vaziyat o‘zgarmasdan qoladi. Hozirgi avlod jangni yaxshi ko‘radi, faqat yangi avlodgina nimanidir o‘zgartirishi mumkin”, — degan Deripaska.

Ayni paytda Rossiya va AQSh o‘rtasida Suriya, Ukraina, Eron va endi Venusuela masalasida jiddiy kelishmovchiliklar mavjud. AQSh Rossiyaga nisbatan jazo choralarini kuchaytiraveradi.

Kechirimlilik — islom asosi

Foto: AP Photo

New Zealand Herald nashri mamlakatdagi xunrezlikdan so‘ng musulmonlar o‘zini qanday tutayotganligi borasida e’tiborga molik maqola chop etdi. Maqolada xunrezlikdan so‘ng omon qolgan va nogironga aylanib qolgan Farid Ahmadning quyidagi so‘zlari keltiriladi:

“Agar uning (Brayan Tarrant) onasini ko‘rsam, u onaizorga ‘xolajon’ deb yuzlangan bo‘lar edim”, — degan jabrlanuvchi.

Qotil an-Nur masjidida ayollar va bolalarga ham shafqat qilmay, ularni otib o‘ldirgan. Shu jumladan, Farid Ahmadning rafiqasi Husni Ahmad ham bir guruh ayol va bolalarni yon eshikdan olib chiqib qutqargach, erini olib chiqish uchun qaytganda otib tashlangan.

“Men murdalar va yaradorlarni, qonnining sizib chiqishini, vahimaga tushganlarni ko‘rdim…” Qotil 50 kishining umriga zomin bo‘ldi, ko‘pchilikni yarador qildi. Ammo Farid Ahmad qotilning tog‘ri yo‘lga qaytishiga umid qilmoqda.

“Ko‘pchilik meni aqldan ozgan deb o‘ylashi mumkin, lekin men chin dildan gapiryapman. Tilyog‘lamalik qilayotganim yo‘q. Imkoni bo‘lganda, men uni quchar edim. U xato qildi, inson xato qiladi. Ammo unga nisbatan nafratim yo‘q”, — deb javob bergan jurnalistlarga Farid Ahmad.

Islomofobiyaning ildizi

“Islomofobiya” — islomni yomon ko‘rish, yoqtirmaslik, islomdan qo‘rqish demak. Dunya Bulteni nashri shu haqda maqola e’lon qildi.

Foto: The Guardian

Islom omili u paydo bo‘lgandan beri mavjud. Salib yurishlarini eslasangiz kifoya. Lekin 1990-yillardan boshlab AQSh va Yevropada islom diniga va musulmonlarga dushmanlarcha qarash kuchayib ketdi. Bunga asosiy sabab AQSh va Yevropa hukmron doiralariga Sovet Ittifoqi parchalanib ketganidan keyin kerak bo‘lib qolgan yangi dushman qiyofasidagi islom dini edi.

AQShning dunyoda hukmronlik qilish borasidagi da’volari uchun albatta “dushman” kerak. Dushman bo‘lmasa, dushmanni o‘ylab topishadi.

Islomofobiya, islomga dushmanlik asosida irqchilikni ham targ‘ib etadi, xohlaymizmi, yo‘qmi, islomofobiya ham irqchilik va islomdan qo‘rqishning aralashib ketgan shaklidir. Musulmonlarni zo‘ravon, zulm yetkazuvchi qilib tasvirlash, totalitar xarakterga ega deb hisoblash asosida aynan shular yotadi.

Islomga dushmanlikning yana bir asosiy sabablari sionizm va unga yaqin bo‘lgan injiliy nasorolikdir. Bu oqimlar Isroil davlati, uning arablarga qarshi aparteid siyosatini qo‘llab-quvvatlash uchun hech qanday vositalardan tap tortmasdan foydalanishida ko‘rinadi. Ayni paytda butun boshli tizimlar islomofobiyani keng ommaga yoyish maqsadida xizmat qilmoqda. Bunga bahonalar doim bisyor, bir tafakkur qiling, aslida “jihod” niqobi ostidagi teraktlar ortida kimlar turibdi?

Ingliz tili ustunligini saqlab qoladimi?

Xitoy tilida 1 milliard 200 million, hind tilida 260 million, ispan tilida 400 milliondan ortiq inson o‘z ona tilisi sifatida gaplashmoqda. Shunday ekan, ingliz tili dunyo miqyosida o‘z ustunligini saqlab qoladimi?

Foto: Google Photos

Til xalqaro miqyosga ega bo‘lishi uchun unda gaplashadigan odamlarning soniga bog‘liq emas, deb yozadi Atlantico nashri.

Til uning turli xalq va elatlar o‘rtasida muomala tili sifatida yoyilishi sababli xalqaro tilga aylanadi. Xalqaro tilni aynan xalqaro til bo‘lgani uchun ham o‘rganishadi.

Ingliz tili Britaniyaning savdo-sotiqdagi ustunligi va AQShning bugungi kundagi iqtisodiyoti evaziga bugungi maqomga erishdi desa mubolag‘a bo‘lmaydi. Ingliz tili bugungi kunda, eng avvalo, Gollivud, Amazon, Netflix tili sifatida ham tanilmoqda. Sababi — internetdagi mazkur nomlarning u yoki bu turdagi mahsulotini xarid qilishga chog‘lanar ekansiz, siz ingliz tilidan boxabar bo‘lishingiz kerak, deb yoziladi maqolada.

Ingliz tilli davlatlarning iqtisodiy qudrati saqlanib qolaverar ekan, yaqin yuz – ikki yuz yil ichida bu til o‘z xalqaro ahamiyatini saqlab qolaveradi.