Сурхондарё вилоятида вояга етмаганлар ва ёшлар ўртасида ҳуқуқбузарлик ва жиноятчиликнинг олдини олиш борасида олиб борилаётган профилактик тадбирларга қарамасдан, айрим вояга етмаганлар улар томонидан турли жиноятлар содир этиш ҳолатлари учраб турибди, деб маълумот берди, Жиноят ишлари бўйича Қизириқ туман судининг раиси Б.Мамадаминов. Бу ҳақда ЎзА хабарида айтилади.
Қайд этилишича, Қизириқ туманида яшовчи Ж.Салоҳиддинов, И.Жўраев ва Э.Абдураҳмоновлар 2018 йил 25 ноябрь куни соат 02:00 ларда Қизириқ тумани, «Рабатак» маҳалла ҳудудидаги М.Ҳасановга тегишли бўлган «Келажак Парвози» савдо дўконига келиб, атрофда ҳеч ким йўқлигидан фойдаланиб, дўкон эшигини калит танлаш йўли билан очиб, жами 23 550 000 сўмлик товар моддий бойликларини яширин равишда талон-торож қилиб, воқеа жойидан яширинган.
Олиб борилган тезкор суриштирув ҳаракатлари давомида Э.Абдураҳмонов, Ж.Салоҳиддинов ҳамда И.Жўраевдан 6 дона LED 32/9000 моделли Artel русумли телевизорлар, 3 дона 32 АN 90 G SMART моделли телевизорлар, 2 дона Lenovo русумли ноутбук компьютерлар, 2 дўкон эшигининг калитлари ва 2 604 000 сўм ашёвий далил сифатида олинган.
Жиноят ишлари бўйича Қизириқ туман судининг Қизириқ туман ички ишлар бўлимида бўлиб ўтган очиқ сайёр суд мажлисида мазкур жиноят иши кўриб чиқилди.
Суд, Ж.Салоҳиддинов, И.Жўраев ва Э.Абдураҳмоновларни Ўзбекистон Республикаси Жиноят Кодексининг 169-моддаси (Ўғрилик) 2-қисми «в», «г» бандлари билан айбли деб топди ва Ўзбекистон Ёшлар Иттифоқи Қизириқ тумани Кенгашининг ва кенг жамоатчиликнинг кафиллигини эътиборга олиб, уларни Ўзбекистон Республикаси ЖКнинг 70-моддасига асосан жазодан озод қилди.
Изоҳ (0)