“Ан-Насср” Роналдунинг тавсияси билан Фернандешни сотиб олмоқчи

Саудия Арабистонининг “Ан-Насср” клуби Бруну Фернандешни ўз сафига қўшиб олишни режалаштирмоқда. Бу ҳақда Foot Mercato нашри хабар берди.

Манбага кўра, риёдликлар аллақачон футболчининг вакиллари билан музокараларни бошлаган. Аввалроқ Бруну “Ал-Ҳилол” клубининг йилига 70 миллион евролик таклифини рад этган эди. “Ан-Насср” эса ундан ҳам юқори таклиф тайёрламоқда. Қолаверса, Криштиану Роналду бу трансферни амалга ошириш учун музокараларда фаол иштирок этаётгани айтилмоқда.

Риёд клуби сўнгги йилларда Роналдунинг яқин дўстларини жамоага жалб этиш билан шуғулланмоқда. Шу мақсадда “Манчестер Юнайтед” етакчисининг номзоди ҳам кўриб чиқилмоқда. Шунингдек, Роналдунинг тавсияси асосида Жоау Феликс билан икки йиллик шартнома имзоланди. Роналду бу трансферни шахсан назорат қилган, ҳатто шахсий самолётини юбориб, Феликсни Саудия Арабистонига олиб келган.

Фернандешнинг Саудия Арабистонига кўчиб ўтиши борасида “Ан-Насср” устози Хорхе Жезус ҳам ижобий фикр билдирмоқда. Айнан у илгари Брунуга “Спортинг”да устозлик қилган эди.

Бироқ “Манчестер Юнайтед” 30 ёшли ярим ҳимоячидан воз кечишга шошилмаяпти. Брунунинг клуб билан амалдаги шартномаси 2027 йилгача мўлжалланган бўлиб, инглиз клуби уни битим якунига қадар жамоада сақлаб қолишни режалаштирмоқда.