Ташқи ишлар вазирининг ўринбосари Алишер Абдуалиев Туркиянинг Kanimed Alles Sag‘lik Cozumleri компанияси бош директори Филиз Эрдўғон билан учрашди. Бу ҳақда ТИВ матбуот хизмати хабар берди.
Президентнинг 28 февраль — 1 март кунлари Наманган вилоятига қилган ташрифи чоғида берган топшириқларини амалга ошириш доирасида Ташқи ишлар вазирлигидаги учрашувда Учқўрғон туманида замонавий гемодиализ ва диагностика лабораторияси марказини ташкил этиш масалалари муҳокама қилинди.
Музокаралар якунида 18 март куни турк делегациясининг вилоят ва туман ҳокимликлари раҳбарияти билан учрашув ўтказиши ҳамда бўлажак марказнинг жойлашув ўрни ва лойиҳани амалга ошириш билан боғлиқ бошқа масалаларни ўрганиш учун Учқўрғон туманига бориши режалаштирилди.
Ҳозирда Kanimed Alles Sag‘lik Cozumleri (Alles Sag‘lik Group) компанияси Ўзбекистоннинг Туркиядаги элчихонаси кўмагида Сурхондарё вилоятининг Термиз шаҳрида 1 миллион АҚШ долларидан ортиқ миқдордаги тўғридан-тўғри инвестицияни жалб қилган ҳолда лаборатория-диагностика марказини барпо этиш ишларини олиб бормоқда. Ҳафта давомида турк делегациясининг кейинчалик лаборатория ускунасини ўрнатиш мақсадида марказ биносида таъмирлаш ишларини олиб бориш учун Термиз шаҳрига бориши режалаштирилган.
Изоҳ (0)