Юнусобод туманида жойлашган 21-сонли Меҳрибонлик уйининг 50 нафар тарбияланувчиси учун Ўзбекистон Республикаси Қуролли Кучлари Академияси бўйлаб махсус экскурсия ташкил этилди. Бу ҳақда Мудофаа вазирлиги матбуот хизмати «Дарё»га маълум қилди.
Эрта тонгдан етиб келган болажонларни мудофаа вазирининг тарбиявий ва мафкуравий ишлар бўйича ўринбосари, Қуролли Кучлар Академияси бошлиғи вазифасини бажарувчи полковник Азизбек Икрамов шахсан кутиб олиб, уларни қутлади.
Шундан сўнг Меҳрибонлик уйи тарбияланувчилари Қуролли Кучлар Академияси музейидан жой олган экспонатлар, ўқув хоналари, курсантларнинг ётоқхоналари билан батафсил таништирилди.
«Кўнгли ярим болажонларим учун байрам арафаси бу каби экскурсиянинг ташкиллаштирилиши айни муддао бўлди. Бир чимдим меҳрга ташна болалар курсантлар томонидан жудаям илиқ кутиб олинганлигидан бошлари осмонга етди. Ҳарбийларнинг бир-бирига нисбатан ҳурмати, аҳил-иноқлиги эса улар учун алоҳида мактаб вазифасини ўтади. Келажакда қайси касбни танлаш ҳақида ўйлаб юрганларнинг барчаси бугунги саёҳатдан кейин «ҳарбий бўламан» демоқдалар. Бу каби ташаббуслар давомли бўлишини истардим», — дейди тарбиячи Баҳора Ҳакимова.
Академия стадионида болажонлар икки гуруҳга бўлиниб, турли эстафета мусобақалари ва кўнгилочар беллашувларда ўзаро баҳслашишди. Ҳарбий оркестр томонидан ижро этилган куй-садолари эса нафақат болажонларни, балки курсантларни ҳам даврага чиқиб, рақсга тушишга «мажбур қилди». Курсантларнинг қуроллар ёрдамида кўргазмали чиқишлари эса йиғилганларнинг ҳеч бирини бееътибор қолдирмади.
Экскурсиянинг сўнггида меҳмонлар замонавий технологиялар билан жиҳозланган ва жаҳон ҳамда ўзбек адабиёти дурдоналарини ўз ичига қамраб олган академия кутубхонаси билан танишдилар.
Шундан кейин болалар тушлик қилиш учун курсантлар ошхонасига йўл олди. Меҳрибонлик уйи тарбияланувчилари эътиборига курсантларнинг таомномасидан жой олган мазали таомлар, мевалар тортиқ этилди.
Тадбир якунида бир неча соатлик экскурсия давомида ака-укадек бўлиб қолган курсантлар ва болажонлар бундан кейин ҳам тез-тез кўришиб туришни ваъдалашган ҳолда хайрлашдилар.
Изоҳ (0)