Ўзбекистон Республикаси мустақиллигининг 27 йиллик байрами арафасида хизмат вазифасини ўташ вақтида ҳалок бўлган ҳарбий хизматчиларнинг бир гуруҳ оила аъзолари маданий ҳордиқ чиқариш учун Хитойга йўл олди. Саёҳатчиларни кузатиш маросими Қуролли Кучлари давлат музейида бўлиб ўтди. Бу ҳақда Мудофаа вазирлиги матбуот хизмати хабар берди.
Маросимда Хитойнинг Ўзбекистондаги элчиси Цзян Ян, Ўзбекистон мудофаа вазирининг тарбиявий ва мафкуравий ишлар бўйича ўринбосари полковник Азизбек Икрамов ҳамда оммавий ахборот воситалари вакиллари иштирок этди.
Эслатиб ўтамиз, Ўзбекистон Президентининг 2018 йил 4 августдаги «Ўзбекистон Республикаси Қуролли Кучлари ҳарбий хизматчиларининг маънавий-маърифий савиясини ошириш тизимини тубдан такомиллаштириш тўғрисида»ги қарори билан мустақиллик йилларида хизмат вазифаларини бажариш чоғида ҳалок бўлган ҳарбий хизматчилар хотирасини абадийлаштириш ҳамда уларнинг оила аъзоларини ижтимоий қўллаб-қувватлаш бўйича қатор вазифалар белгилаб берилган эди.
Ушбу қарор ижросини таъминлаш доирасида Ўзбекистон Республикаси Қуролли Кучларида хизмат бурчини ўташ чоғида ҳалок бўлган ҳарбий хизматчиларнинг оила аъзолари 10 кун давомида Хитойнинг диққатга сазовор жойларига саёҳат қиладилар.
«Ўғлим Шуҳратбек Собиров 2000 йили юртимизнинг жанубий ҳудудларига суқилиб кирган бир гуруҳ террорчилар билан бўлган тўқнашувда қаҳрамонларча ҳалок бўлди. Ўғлим 25 ёшида Ўзбекистон халқини ҳимоя қилиб, барчага ўрнак бўлди. Мен у билан умрбод фахрланаман. Ўзбекистон Президентининг эътиборлари сабаб, бугун биз Хитой давлатига саёҳатга кетяпмиз. Бундай рағбатдан бошимиз кўкка етди...», – дейди Андижон вилоятидан келган Сотқинбой Собиров.
Изоҳ (0)