Yunusobod tumanida joylashgan 21-sonli Mehribonlik uyining 50 nafar tarbiyalanuvchisi uchun O‘zbekiston Respublikasi Qurolli Kuchlari Akademiyasi bo‘ylab maxsus ekskursiya tashkil etildi. Bu haqda Mudofaa vazirligi matbuot xizmati “Daryo”ga ma’lum qildi.
Erta tongdan yetib kelgan bolajonlarni mudofaa vazirining tarbiyaviy va mafkuraviy ishlar bo‘yicha o‘rinbosari, Qurolli Kuchlar Akademiyasi boshlig‘i vazifasini bajaruvchi polkovnik Azizbek Ikramov shaxsan kutib olib, ularni qutladi.
Shundan so‘ng Mehribonlik uyi tarbiyalanuvchilari Qurolli Kuchlar Akademiyasi muzeyidan joy olgan eksponatlar, o‘quv xonalari, kursantlarning yotoqxonalari bilan batafsil tanishtirildi.
“Ko‘ngli yarim bolajonlarim uchun bayram arafasi bu kabi ekskursiyaning tashkillashtirilishi ayni muddao bo‘ldi. Bir chimdim mehrga tashna bolalar kursantlar tomonidan judayam iliq kutib olinganligidan boshlari osmonga yetdi. Harbiylarning bir-biriga nisbatan hurmati, ahil-inoqligi esa ular uchun alohida maktab vazifasini o‘tadi. Kelajakda qaysi kasbni tanlash haqida o‘ylab yurganlarning barchasi bugungi sayohatdan keyin “harbiy bo‘laman” demoqdalar. Bu kabi tashabbuslar davomli bo‘lishini istardim”, — deydi tarbiyachi Bahora Hakimova.
Akademiya stadionida bolajonlar ikki guruhga bo‘linib, turli estafeta musobaqalari va ko‘ngilochar bellashuvlarda o‘zaro bahslashishdi. Harbiy orkestr tomonidan ijro etilgan kuy-sadolari esa nafaqat bolajonlarni, balki kursantlarni ham davraga chiqib, raqsga tushishga “majbur qildi”. Kursantlarning qurollar yordamida ko‘rgazmali chiqishlari esa yig‘ilganlarning hech birini bee’tibor qoldirmadi.
Ekskursiyaning so‘nggida mehmonlar zamonaviy texnologiyalar bilan jihozlangan va jahon hamda o‘zbek adabiyoti durdonalarini o‘z ichiga qamrab olgan akademiya kutubxonasi bilan tanishdilar.
Shundan keyin bolalar tushlik qilish uchun kursantlar oshxonasiga yo‘l oldi. Mehribonlik uyi tarbiyalanuvchilari e’tiboriga kursantlarning taomnomasidan joy olgan mazali taomlar, mevalar tortiq etildi.
Tadbir yakunida bir necha soatlik ekskursiya davomida aka-ukadek bo‘lib qolgan kursantlar va bolajonlar bundan keyin ham tez-tez ko‘rishib turishni va’dalashgan holda xayrlashdilar.
Izoh (0)