Ўзбекистон давлат мустақиллигининг 27 йиллик байрами арафасида Наманган шаҳрида бунёд этилган 14-оилавий поликлиника фойдаланишга топширилди. Бу ҳақда ЎзА хабар берди.
Шу муносабат билан ташкил этилган тадбирда давлат ва жамоат ташкилотлари вакиллари, нуронийлар, тиббиёт фахрийлари, оммавий ахборот воситалари ходимлари иштирок этди.
Икки қаватли замонавий шифо масканида «Наманган давр қурилиш» масъулияти чекланган жамияти бунёдкорлари томонидан 4,814 миллиард сўмлик қурилиш-монтаж ишлари бажарилди.
250 кишига мўлжалланган мазкур тиббиёт муассасаси шаҳардаги Ғишткўприк, Чорсу, Маданий, Сумалак гузари ва Маданий-маориф маҳалларида истиқомат қилувчи 32 мингдан зиёд аҳолига тиббий хизмат кўрсатади. Бу ерда 21 нафар шифокор ва 56 нафар ўрта тиббиёт ходими фаолият олиб боради.
Янги оилавий поликлиника хоналари кенг ва шинам. Тиббий талаблардан келиб чиқиб ишланган мебеллар билан таъминланган. Энг сўнгги русумдаги ахборот-коммуникация технологиялари жорий қилинган. «Электрон поликлиника» автоматлаштирилган тизимга уланган. Тиббий хизмат ва муолажалар замонавий аппаратлар воситасида бажарилади.
Поликлиникага тез кунларда «Саломатлик-3» лойиҳаси доирасида 152 минг долларлик янги асбоб-ускуналар олиб келиниши кутилмоқда.
Изоҳ (0)