12 январь куни мамлакат футболи раҳбари Фарғона вилояти ҳокими ва бир вақтнинг ўзида минтақа футбол федерацияси президенти Шуҳрат Ғаниев билан кўришди. Бунда икки раҳбар Фарғонада миллионлар ўйинини ривожлантириш масаласида суҳбатлашган.
Ҳоким билан суҳбатдан сўнг Аҳмаджонов «Нефтчи» клубига қарашли «Истиқлол» стадионига келган ва шароитлар билан яқиндан танишган. ЎФФ матбуот хизматининг қайд этишича, 20 минг мухлис учун мўлжалланган стадионда ўйинларни юқори савияда ўтказиш учун барча шароит бор. Шундан келиб чиқиб, Аҳмаджонов «Истиқлол» стадиони имкониятларини яхши баҳолаган.
Стадиондан чиққач, у «Нефтчи»нинг аёл футболчилари билан учрашган. Улар иштирокидаги машғулотни кузатиб, кейинроқ футболчиларга янги тўплар совға қилган. Худди шу ҳол «Нефтчи» футбол мактаби тарбияланувчилари билан ҳам кузатилган.
Делегациянинг кейинги манзили Фарғона вилоят футбол федерацияси бўлди. Унинг фаолияти билан танишиб чиққан Умид Аҳмаджонов, шу ернинг ўзида масъуллар билан анжуман ўтказган. Мажлисда нафақат Фарғона, балки Андижон ва Наманган футбол федерацияларининг ходимлари ҳам иштирок этган. Шунингдек, унга ОАВ ходимлари ҳам таклиф этилган.