Россиянинг Белоярский шаҳрида бўлиб ўтаётган бокс бўйича «Нефть мамлакатлари кубоги»да биринчи ғолиб номи аниқ бўлди. Бу ҳақда «Sports.uz» хабар бермоқда.
Ўзи учун бутунлай янги вазн тоифаси — 52 килограммгача вазнда жангларда иштирок этган ўзбекистонлик, олимпиада чемпиони Ҳасанбой Дўсматов ҳал қилувчи финал жангини россиялик Расул Жааевга қарши ўтказди. Жангда тўлиқ устунликка эришган Дўсматов олтин медалга эга чиқди.
Маълумот учун, бунга қадар Ҳасанбой Дўсматов -49 килограмм вазн тоифасида жангларда иштирок этиб келарди. Боксчи Риодаги олимпиадада ҳам айнан шу вазнда чемпионлик унвонига эга чиққан эди.
Шунингдек, бугун турнирда яна тўрт нафар ўзбекистонлик боксчи финал жангларини ўтказади. Барча жанглар россиялик боксчиларга қарши ўтади. 64 килограммгача вазнда Иқболжон Холдоров Григорий Лизуненко билан, 75 килограммгача бўлган вазнда Исроил Мадримов Андрей Ковальчук билан олтин медаллар учун жангга чиқади. Учинчи финал учрашувида эса Санжар Турсунов (-91 кг) яна бир мезбон спортчи Василий Зверьянга қарши рингга кўтарилади.
Изоҳ (0)