Американинг Berkshire Hathaway холдинги раҳбари миллиардер Уоррен Баффетнинг ўринбосарлигига икки асосий номзод аниқланди. Бу ҳақда 10 январь куни The Wall Street Journal газетаси маълум қилди, деб ёзади «ТАСС».
Berkshire Hathaway’нинг қайта суғурталаш бизнеси бўйича раҳбар Аджит Жейн ва энергетика бўлими раҳбари Грег Абел холдинг директорлар кенгашида яқинда яратилган лавозимларга тайинланди. «Улар энди Berkshire’да ворислик масаласида икки асосий фигура ҳисобланади», — дейди 87 ёшли Баффет.
Баффет 10 январь куни CNBC телеканали эфирида соғлиғи мустаҳкам эканлиги ва у яқин келажакда холдинг директорлар кенгаши раиси ва бош ижрочи директори лавозимларини тарк этишни режалаштирмаганлигини маълум қилди. Бироқ миллиардер Berkshire Hathaway раҳбарлигида яна 10 йил жуда узоқ муддат эканлигини билдирди.
Беффет бошқарувидаги Berkshire Hathaway холдинги йиллар давомида 80 га яқин компаниядан иборат конгломератга айланди. Улар суғурта, инвестиция, мебел, заргарлик буюмлари, кийим-кечак ва озиқ-овқат ишлаб чиқариш ва сотиш соҳаларида фаолият кўрсатади.
Изоҳ (0)