10–12 ноябрь кунлари Ўзбекистоннинг Афинадаги бош консуллиги томонидан Грециянинг машҳур «Алкионис» кинотеатрида ўзбек киноси кунлари ўтказилди. Бу ҳақда «Ўзбеккино» миллий агентлиги маълум қилди.
Тадбир Ўзбекистон ва Греция ўртасида маданий ва гуманитар соҳалардаги ҳамкорликни ривожлантириш, Греция жамоатчилигида Ўзбекистон маданияти ва санъатини тарғиб қилиш, шунингдек, Ўзбекистонга сайёҳлар оқимини ошириш мақсадида ташкил қилинди.
Ўзбекистон ва Греция ўртасида дипломатик алоқалар ўрнатилганлигининг 25 йиллиги муносабати билан ўтказилаётган тадбирлар доирасида бўлиб ўтган ушбу кинофестивалнинг очилиш маросимида Афина шаҳри муниципалитети вакиллари, Греция парламенти депутатлари, давлат ва жамоат вакиллари, жами 350 киши иштирок этди.
Кинофестивалда томошабинлар режиссёр Шуҳрат Маҳмудовнинг буюк аллома Абу Али ибн Сино ҳаётига бағишланган «Шарқдан таралган нур» номли бадиий — публицистик фильми, Қамара Камолованинг «Йўл бўлсин» ва Жасур Ишоқовнинг «Ҳақиқат куни» бадиий фильмларига баҳо бериш имкониятига эга бўлди.
Кинофестиваль доирасида «Ўзбекистон грециялик сайёҳлар нигоҳида» номли фотокўргазма ҳамда Тошкент, Самарқанд, Бухоро, Хива, Шаҳрисабз ва Термиз шаҳарларининг тарихий обидалари тақдимотлари ўтказилди.
Изоҳ (0)