Калифорнияда дунёда илк бор инсон геномини унинг танасида ўзгартириш бўйича муолажа ўтказилди. Бу ҳақда Meduza хабар бермоқда.
II тип мукополисахаридоз (Хантер синдроми) билан касалланган эркак биринчи беморга айланди. Дунёда атиги 10 мингга яқин кишида учровчи бу синдром фермент ишлаб чиқариш учун масъул генлардаги мутация билан боғлиқ ирсий касаллик бўлиб, у туфайли Аризонада яшовчи 44 ёшли Брайан Мадо ҳаёти давомида 26 та операцияни бошидан кечиришига тўғри келган.
Мадонинг ҳолатида қўлланган услуб геномни тўғридан-тўғри инсон танасида ўзгартириш имконини беради. Бунда ДНКнинг маълум бир жойига аниқ тушишнинг ўзи кифоя.
Sangamo Therapeutics компанияси раҳбарига кўра, «бу организмга митти жарроҳни киритишга ўхшайди. У ўзи ДНКни қирқади, генни жойлаштиради ва тикади. Ген ДНКнинг бир қисмига айланади ва унда бир умр қолади». Брайан Мадо билан ўтказилган муолажа инсонга томизгич орқали етишмаётган ген киритилган биринчи ҳолат бўлди.
Илк натижалар бир ойдан сўнг маълум бўлади, уч ойдан сўнг эса таҳлиллар олимлар Мадони Хантер синдромидан қутқара олганини тасдиқлаши лозим. Ундан ташқари, янги услубнинг клиник синовларида яна 29 киши иштирок этади. Агар даволаш самарали кечса, у келгусида болаларда ҳам қўлланади.
Изоҳ (0)