Россиянинг Командор оролларида Стеллер денгиз сигирининг деярли бутун скелети топилди

Командор оролларида сўнгги 40 йил ичида илк марта қирилиб кетган Стеллер денгиз сигирининг скелети топилди, деб хабар беради «ТАСС».

Мазкур скелет Камчатканинг Никольское Алеуцкий қишлоғида жойлашган Командор қўриқхонаси сайёҳлик марказининг асосий экспонатига айланади.

Ноёб топилма қўриқхона илмий ходими томонидан аниқланди.

«Қўриқхона илмий ходими Марина Шитова орол соҳилларида ўтказган навбатдаги текширув ишларида қирилиб кетган Стеллер денгиз сигирининг скелетини топди. У денгиз шағали ва қумнинг остида 70 сантиметр чуқурликда кўмилиб ётган эди. Денгиз сигирининг деярли бутун скелети бундан аввал 1987 йилда Беринг оролида топилган эди. Ҳозир топилган скелет қўриқхона сайёҳлик марказининг асосий экспонатига айланади», — дейилади хабарда.

Скелетнинг умумий узунлиги 5,2 метрни ташкил этди, бироқ етишмаётган қисмлар узунлигини ҳам инобатга олган ҳолда жониворнинг узунлиги олти метр бўлганини тахмин қилиш мумкин.

«Стеллер денгиз сигири скелетининг топилиши жуда муҳим ҳодиса. Маълумки, унинг барча бутун скелетлари XIX асрда топилган. Қўриқхонада ҳозиргача денгиз сигирининг скелети йўқ эди», — дейилади хабарда.

1741 йилда Командор ороллари кашф қилинган пайтда Стеллер денгиз сигири фақат мазкур ҳудудда сақланиб қолганлиги аниқланган.  Йирик жониворнинг узунлиги, айрим маълумотларга кўра, 10 метр, оғирлиги эса беш тоннани ташкил этган. Ҳайвонни ўз кўзи билан кўрган ва тасвирлаб берган ягона тадқиқотчи немис шифокори Георг Стеллер бўлган. Командорда Стеллер денгиз сигири топилганидан 27 йил ўтиб, бу турдаги ҳайвонлар қирилиб кетган.