Олимлар ортиқча овқат истеъмол қилиш ва жисмоний машқларнинг етишмаслиги юз фоиз семиришга олиб келмаслигини исботлади. Тегишли тадқиқот натижалари Американинг Дьюк университетининг сайтида эълон қилинди.
Тадқиқотчиларнинг аниқлашича, анкирин-Б оқсилини ташувчилар тўғри ҳаёт тарзини кечиришига қарамай ортиқча вазнга эга бўлаверади. Сичқонлар устида ўтказилган тажрибалар натижасида маълум бўлдики, баъзи ҳолларда ҳайвонларнинг ёғ ҳужайралари глюкозани керагидан ортиқроқ тезликда сўриб олади. Агарда бунга ўзгарувчан метаболизм ҳамда юқори ёғли диэта қўшилса, семириш ҳолатидан деярли қочиб бўлмайди.
Биологларнинг таъкидлашича, анкирин-Б ўтмишдаги одамларга очлик вақтларида энергия захирасини тўплаш имконини берган, ҳозирги замонда эса озиқ-овқатлар етарли бўлганлиги сабаб бу семириш эпидемиясига олиб келиши мумкин.
Ноябрь ойининг бошида АҚШдаги Бейлор тиббиёт коллежининг олимлари аспросин гормони иштаҳа ва тана оғирлигини назорат қилувчи мия фаолиятини тартибга солишини аниқлашга муваффақ бўлган эди.
Изоҳ (0)