Россиялик олимлар сунъий буйракни синовдан ўтказди

«Москва электрон техника институти» (МЭTИ) қошидаги Миллий тадқиқот университетининг олимлари қонни тозалашга мўлжалланган «сунъий буйрак» қурилмасини яратди. Бунинг учун қурилмадаги махсус эритмани бир суткада икки марта алмаштириш даркор, деб хабар берди «Наука».

«Сунъий буйраклар» одатда метаболик маҳсулотлардан қонни тозалаш ва электролит-сувли ҳамда кислота-асосли мувозанатларини тиклаш учун ишлатилади. Бу ўткир ва сурункали буйрак етишмаслиги, шунингдек, заҳарланиш ҳолатларда зарур.

Замонавий тиббиётда қонни тозалашнинг иккита сунъий усули мавжуд: гемодиализ ва перитонеаль диализ. Гемодиализда қон одам танасидан ташқарида, махсус марказларда тозаланади. Перитонеаль диализда эса махсус эритма беморнинг қорин бўшлиғига жойлаштирилади. Эритмани бир кунда бир неча бор алмаштириш керак. Россияда биринчи усул кенг тарқалганлигига қарамай, олимлар перитонеаль диализнинг осон усулини яратиш ниятида.

Бунинг учун олимлар доим ёнида кўтариб юриш мумкин бўлган янги қурилмани ихтиро қилди. Тизим перитонеаль диализ усулида, доимий алмашиб турувчи эритма ёрдамида ишлайди. Шу сабабли уни мунтазам эмас, кунига бир ёки икки марта алмаштириш кифоя.