Kaliforniyada dunyoda ilk bor inson genomini uning tanasida o‘zgartirish bo‘yicha muolaja o‘tkazildi. Bu haqda Meduza xabar bermoqda.
II tip mukopolisaxaridoz (Xanter sindromi) bilan kasallangan erkak birinchi bemorga aylandi. Dunyoda atigi 10 mingga yaqin kishida uchrovchi bu sindrom ferment ishlab chiqarish uchun mas’ul genlardagi mutatsiya bilan bog‘liq irsiy kasallik bo‘lib, u tufayli Arizonada yashovchi 44 yoshli Brayan Mado hayoti davomida 26 ta operatsiyani boshidan kechirishiga to‘g‘ri kelgan.
Madoning holatida qo‘llangan uslub genomni to‘g‘ridan-to‘g‘ri inson tanasida o‘zgartirish imkonini beradi. Bunda DNKning ma’lum bir joyiga aniq tushishning o‘zi kifoya.
Sangamo Therapeutics kompaniyasi rahbariga ko‘ra, “bu organizmga mitti jarrohni kiritishga o‘xshaydi. U o‘zi DNKni qirqadi, genni joylashtiradi va tikadi. Gen DNKning bir qismiga aylanadi va unda bir umr qoladi”. Brayan Mado bilan o‘tkazilgan muolaja insonga tomizgich orqali yetishmayotgan gen kiritilgan birinchi holat bo‘ldi.
Ilk natijalar bir oydan so‘ng ma’lum bo‘ladi, uch oydan so‘ng esa tahlillar olimlar Madoni Xanter sindromidan qutqara olganini tasdiqlashi lozim. Undan tashqari, yangi uslubning klinik sinovlarida yana 29 kishi ishtirok etadi. Agar davolash samarali kechsa, u kelgusida bolalarda ham qo‘llanadi.
Izoh (0)