Британия ҳукумати Тереза Мэйнинг яқин орада истеъфога чиқиши ҳақидаги гап-сўзларни рад этди

Британия ҳукумати девонхонаси бошлиғи Дэмиан Грин ва бир неча вазирлар навбатдаги гап-сўзларга жавобан бош вазир Тереза Мэй истеъфога чиқишни режалаштирмаётганини маълум қилди. Бу ҳақда «РИА Новости» хабар бермоқда.

Аввалроқ, Консерватив партияси вакилларидан бири Мэй атрофидаги вазият уни яқин орада истеъфога чиқишга мажбур этишини таъкидлаган эди.

Унинг сўзларига кўра, бу бир нечта сабаблар билан боғлиқ, хусусан бош вазир Консерватив партия парламентдаги кўпчиликни бой бергани ва Brexit бўйича музокаралар жараёнидаги мавқейи пасайгани шулар жумласидан.

Кўпчиликнинг фикрича, Мэйнинг 4 октябрь, чоршанба куни Консерватив партия съездидаги чиқиши сўнгги нуқта бўлган.

Нутқ аввалига қизиқчи Саймон Бродкин томонидан Тераза Мэйнинг қўлига иш ўрнидан бўшаётганда тўлдириладиган P45 шаклини тутқазганидан сўнг узилиб қолди. Сўнг Мэйнинг овози пасайиб кетиб, йўтал тутиб қолди. Бош вазир мазкур ҳолат туфайли нутқини зўрға тугатди.

«Биламан, у ҳозир ҳам аввалгидек ишлашни давом эттирмоқда, буни ўз бурчи деб билади ва ҳукуматда муваффақиятга эришишда давом этишни режалаштирмоқда», — дейди Британия ҳукумати бошлиғи Грин.