АПЛ бўтқаси. Англия чемпиони кубокда қуйи лига вакилини енга олмади, Арсен Венгер эса 4 та ўйинга дисквалификация қилинди

Арсен Венгер

Англияда фаолият олиб борадиган мураббийлар орасида энг маданиятлиси бўлиш учун курашувчи Арсен Венгер 4 та ўйинга четлатилди. «Арсенал» устози «Бёрнли»га қарши ўйин вақтида тўртинчи ҳакамни ҳақорат қилган ва натижада қизил карточка олиб, майдонни тарк этганди.

Бугун — 28 январь куни «Арсенал» Англия кубогининг кейинги босқичига чиқиш учун «Саутгемптон»га қарши кураш олиб боради. Мазкур беллашувда Венгер шогирдларига кўрсатма бериб тура олмайди. Қайд этиш керак, «Саутгемптон» Англия Лига кубогида «Арсенал»ни 2:0 ҳисобида мағлуб этиб, турнирдан чиқариб юборганди. Жамоа «Ливерпуль»дек клубни ҳар икки ўйинда ҳам таслим қилганди. Шундан келиб чиқилса, бугун «Арсенал»га осон бўлмайди.

АПЛ доирасида Венгер «Уотфорд», «Челси» ва «Халл Сити» клублари билан ўйинни мухлислар қаторида кузатади. Тўртинчи ҳакамни нафақат ҳақорат қилгани, балки майдонни тарк этар чоғда туртиб кетгани учун мутахассис 25 минг фунт жарима ҳам тўлаб беради.

Англия кубоги

Мамлакат кубогини қўлга киритиш учун 32 жамоа курашни давом эттирмоқда. АПЛнинг амалдаги чемпиони «Лестер» ўз юмушини қийинлаштириб юборди. Сафарда қуйи лига вакилини таслим қила олмаган Клаудио Раньери жамоаси энди шу рақибга қарши яна 1 та ўйинда иштирок этишга мажбур.

Қуйида Англия кубогининг қолган жуфтликлари билан танишиш мумкин. Бунда фақатгина Премьер-лига вакиллари иштирокидаги жуфтликлар кўрсатиб ўтилган.

Англия кубоги 1/16 финал 27 январь, жума

«Дерби Каунти» — «Лестер» 2:2

Голлар: Даррен Бент, 8-авт (0:1). Даррен Бент, 21 (1:1). Крейг Брайсон, 40 (2:1). Уэс Морган, 86 (2:2).

28 январь, шанба«Ливерпуль» — «Вулверҳэмптон»«Тоттенҳэм» — «Уиком Уондерс»«Мидлсбро» — «Аккрингтон Стенли»«Бёрнли» — «Бристол Сити»«Кристал Пэлас» — «Манчестер Сити»«Челси» — «Брентфорд»«Саутгемптон» — «Арсенал»

29 январь, якшанба«Фулҳэм» — «Халл Сити»«Манчестер Юнайтед» — «Уиган»

Артуро Видаль

«Бавария» клуби шарафини ҳимоя қилаётган чилилик футболчи Лондонга кўчиб ўтиш ишқида яшамоқда. «Sports.ru» маълумотига кўра, Видаль «Челси»да фаолиятини давом эттириши мумкин.

«Аристократлар» устози Антонио Конте Видалга «Ювентус» таркибида ҳам устозлик қилганди. Айни вақтда ҳар икки шахс ўзаро тез-тез фикр алмашиб турибди. Бунинг натижасида Видаль инглиз тили курсларига ҳам қатнашни бошлаган.

Режага кўра, «Челси» Видаль учун «Бавария»га 66 миллион евро ўтказиб беради.