Теннис бўйича Australian Open–2017 мусобақасининг иккинчи даврасида ўзбекистонлик Денис Истомин бугун, 19 январь куни жаҳоннинг иккинчи ракеткаси – сербиялик Новак Жоковичга қарши баҳс олиб борди.
Жаҳон рейтингида 117-ўринда бораётган 30 ёшли Ўзбекистон вакили мусобақанинг амалдаги чемпионига қарши қарийб 5 соат давом этган ўйиннинг биринчи сетини 7:6 ҳисобида ўз фойдасига ҳал қилди. Иккинчи сетни ҳам муваффақиятли якунлашга яқин турган Истомин якунда 5:7 ҳисобида ютқазди.
Учинчи сетда Новак Жокович 6:2 ҳисобида зафар қучди. Тўртинчи сетда эса Истомин қийинчилик билан тай-брейкда 7:6 ҳисобида ғалаба қозонди.
Ҳал қилувчи сетда Ўзбекистоннинг биринчи ракеткаси 6:4 ҳисобида зафар қучиб, учинчи даврага йўл олди. Учинчи даврада Денис Истомин испаниялик Пабло Каррено Бустага қарши баҳс олиб боради ва ўйин натижасидан қатъи назар 97 минг доллар ишлаб олади.
Эслатиб ўтамиз, Денис Истомин 17 январь куни ўтказилган илк даврада хорватиялик Иван Додигни 4 сетда – 6:1, 6:4, 3:6, 7:5 мағлуб этганди.
Маълумот учун, Истомин ҳамда Жокович бугунга қадар 5 марта тўқнаш келган. Уларнинг барчасида сербиялик теннисчи ғолиб чиққан эди.
Денис Истоминнинг Australian Open’да қайд этган энг яхши натижаси 2010 ва 2014 йилларга тоғри келган бўлиб, ҳар икки сафар ўзбекистонлик теннисчи учинчи даврагача етиб борганди. Эътиборлиси, ҳар икки сафар ҳам у Новак Жоковичга мағлуб бўлганди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)