APL bo‘tqasi. Angliya chempioni kubokda quyi liga vakilini yenga olmadi, Arsen Venger esa 4 ta o‘yinga diskvalifikatsiya qilindi

Arsen Venger

Angliyada faoliyat olib boradigan murabbiylar orasida eng madaniyatlisi bo‘lish uchun kurashuvchi Arsen Venger 4 ta o‘yinga chetlatildi. “Arsenal” ustozi “Byornli”ga qarshi o‘yin vaqtida to‘rtinchi hakamni haqorat qilgan va natijada qizil kartochka olib, maydonni tark etgandi.

Bugun — 28-yanvar kuni “Arsenal” Angliya kubogining keyingi bosqichiga chiqish uchun “Sautgempton”ga qarshi kurash olib boradi. Mazkur bellashuvda Venger shogirdlariga ko‘rsatma berib tura olmaydi. Qayd etish kerak, “Sautgempton” Angliya Liga kubogida “Arsenal”ni 2:0 hisobida mag‘lub etib, turnirdan chiqarib yuborgandi. Jamoa “Liverpul”dek klubni har ikki o‘yinda ham taslim qilgandi. Shundan kelib chiqilsa, bugun “Arsenal”ga oson bo‘lmaydi.

APL doirasida Venger “Uotford”, “Chelsi” va “Xall Siti” klublari bilan o‘yinni muxlislar qatorida kuzatadi. To‘rtinchi hakamni nafaqat haqorat qilgani, balki maydonni tark etar chog‘da turtib ketgani uchun mutaxassis 25 ming funt jarima ham to‘lab beradi.

Angliya kubogi

Mamlakat kubogini qo‘lga kiritish uchun 32 jamoa kurashni davom ettirmoqda. APLning amaldagi chempioni “Lester” o‘z yumushini qiyinlashtirib yubordi. Safarda quyi liga vakilini taslim qila olmagan Klaudio Ranyeri jamoasi endi shu raqibga qarshi yana 1 ta o‘yinda ishtirok etishga majbur.

Quyida Angliya kubogining qolgan juftliklari bilan tanishish mumkin. Bunda faqatgina Premyer-liga vakillari ishtirokidagi juftliklar ko‘rsatib o‘tilgan.

Angliya kubogi 1/16 final 27-yanvar, juma

“Derbi Kaunti” — “Lester” 2:2

Gollar: Darren Bent, 8-avt (0:1). Darren Bent, 21 (1:1). Kreyg Brayson, 40 (2:1). Ues Morgan, 86 (2:2).

28-yanvar, shanba“Liverpul” — “Vulverhempton”“Tottenhem” — “Uikom Uonders”“Midlsbro” — “Akkrington Stenli”“Byornli” — “Bristol Siti”“Kristal Pelas” — “Manchester Siti”“Chelsi” — “Brentford”“Sautgempton” — “Arsenal”

29-yanvar, yakshanba“Fulhem” — “Xall Siti”“Manchester Yunayted” — “Uigan”

Arturo Vidal

“Bavariya” klubi sharafini himoya qilayotgan chililik futbolchi Londonga ko‘chib o‘tish ishqida yashamoqda. “Sports.ru” ma’lumotiga ko‘ra, Vidal “Chelsi”da faoliyatini davom ettirishi mumkin.

“Aristokratlar” ustozi Antonio Konte Vidalga “Yuventus” tarkibida ham ustozlik qilgandi. Ayni vaqtda har ikki shaxs o‘zaro tez-tez fikr almashib turibdi. Buning natijasida Vidal ingliz tili kurslariga ham qatnashni boshlagan.

Rejaga ko‘ra, “Chelsi” Vidal uchun “Bavariya”ga 66 million yevro o‘tkazib beradi.