Филиппин собиқ президенти Фердинанд Маркос миллат қаҳрамонлари қабристонига ҳарбий иззат-икром билан қайта кўмилди. Бу ҳақда «Интерфакс» хабар бермоқда.
Бу ҳақдаги қарор мамлакат президенти Родриго Дутерте томонидан қабул қилинди, сўнг мамлакат Олий суди мазкур қарорни тасдиқлади.
Расмийларнинг қайта кўмиш ҳақидаги қарори Маркосни жиноятчи, унга кўрсатилган ҳурматни эса жиноятларининг оқланиши деб ҳисоблайдиган Филиппин фуқаролари норозилигига сабаб бўлди. Полиция оммавий норозилик намойишларининг олдини олиш учун собиқ давлат раҳбари қолдиқлари қабристонга маросимдан бироз олдин етказиб келинганини маълум қилди.
Фердинанд Маркос Филиппинни 1965 йилдан 1986 йилгача бошқарган. 1986 йилдаги инқилобдан сўнг оиласи билан АҚШга қочган ва ўша ерда уч йилдан сўнг оламдан ўтган. Ҳукумат тергов комиссияси маълумотларига кўра, Маркос бошқаруви йилларида унинг оиласи ва яқин доираси давлат ғазнасидан 10 миллиард доллар ўмарган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)