Filippin sobiq prezidenti Ferdinand Markos millat qahramonlari qabristoniga harbiy izzat-ikrom bilan qayta ko‘mildi. Bu haqda “Interfaks” xabar bermoqda.
Bu haqdagi qaror mamlakat prezidenti Rodrigo Duterte tomonidan qabul qilindi, so‘ng mamlakat Oliy sudi mazkur qarorni tasdiqladi.
Rasmiylarning qayta ko‘mish haqidagi qarori Markosni jinoyatchi, unga ko‘rsatilgan hurmatni esa jinoyatlarining oqlanishi deb hisoblaydigan Filippin fuqarolari noroziligiga sabab bo‘ldi. Politsiya ommaviy norozilik namoyishlarining oldini olish uchun sobiq davlat rahbari qoldiqlari qabristonga marosimdan biroz oldin yetkazib kelinganini ma’lum qildi.
Ferdinand Markos Filippinni 1965-yildan 1986-yilgacha boshqargan. 1986-yildagi inqilobdan so‘ng oilasi bilan AQShga qochgan va o‘sha yerda uch yildan so‘ng olamdan o‘tgan. Hukumat tergov komissiyasi ma’lumotlariga ko‘ra, Markos boshqaruvi yillarida uning oilasi va yaqin doirasi davlat g‘aznasidan 10 milliard dollar o‘margan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)