Бутунжаҳон бокс ассоциацияси (WBA) версияси бўйича супероғир вазн тоифасида собиқ жаҳон чемпиони, ўзбекистонлик Руслан Чагаев соғлиғидаги муаммолар сабабли фаолиятини расман якунлади. Бу ҳақда боксчининг менежери Тимур Дугазаев «ТАСС»га маълум қилди.
Аввалроқ Русланнинг турмуш ўртоғи Виктория Чагаева у фаолиятини якунлаганини тасдиқлаганди.
«Руслан кўзидаги муаммолар туфайли фаолиятини расман якунлади. Биз Чагаевга хайрлашув жанги – Лукас Браун билан реваншни таклиф қилгандик. Аммо у карьерасини тугатишга қарор қилди, соғлиқ муҳимроқ», – деди Дугазаев.
Руслан Чагаев 2016 йилнинг 5 март куни Грозний шаҳрида австралиялик Лукас Браунга қарши жанг ўтказиб, 10-раундда техник нокаут билан мағлуб бўлган ва чемпионлик камарини бой берганди.
Кейинроқ Лукас Брауннинг қон таҳлилида допинг аниқланди. Боксчилар ўртасидаги жанг натижаси бекор қилиниб, австралиялик чемпионлик камаридан маҳрум этилди. Шундан сўнг, WBA чемпионлик камарини Чагаевга қайтарди ва Русланга Фрес Окендо билан мажбурий жанг ўтказиш учун 120 кун муҳлат берди.
Ўзбекистонлик 37 ёшли боксчи мажбурий жанг ўтказмагани учун WBA уни чемпионлик камаридан маҳрум қилди ва WBA рейтингидан ўчирилди.
Маълумот учун, 2006 йил Чагаев жаҳоннинг собиқ чемпиони — Пуэрто-риколик Жон Руисни мағлуб этишга муваффақ бўлганди. 2007 йилга келиб эса у WBA йўналиши бўйича жаҳон чемпионлигини қўлга киритди. Бу йўлда ўзбекистонлик боксчи россиялик Николай Валуевни мағлубиятга учратганди.
Профессионал рингдаги фаолияти давомида Чагаев 38 та жанг ўтказиб, 34 ғалаба (шулардан 21 таси нокаут билан), 3 мағлубият ва 1 дурангга эришган.
Изоҳ (0)