Ўзбекистон ва Таиланд туризм соҳасидаги ҳамкорликни кенгайтириш бўйича келишувни имзолади

Таиланд қироллиги туризм ва спорт вазири Кобкарн Ваттанаврангкул ҳамда «Ўзбектуризм» миллий компанияси раиси Фаррух Ризаев Тошкентда икки давлатнинг туризм соҳасидаги ҳамкорлиги ҳақидаги келишувни имзолади. Вазирнинг ташрифи Таиланд шерик-давлат бўлган Тошкент халқаро сайёҳлик ярмаркаси доирасида бўлиб ўтди. Бу ҳақда «Газета.uz» хабар бермоқда.

«Келишувдан мақсад — ўзаро сайёҳлар алмашинувини кўпайтиришдан иборат», — дея мазкур ҳужжат имзоланишини изоҳлади Кобкарн Ваттанаврангкул.

Вазирнинг билдиришича, ўтган йили Таиландга Ўзбекистондан 15,6 минг атрофида сайёҳ борган бўлса, Таиланддан Ўзбекистонга 383 нафар меҳмон келди. Ўзбекистон ўтган йили Таиландга сайёҳлик оқимини оширган (2014 йилга нисбатан 20 фоиз) МДҲдаги ягона давлат бўлди: Россияда бу кўрсаткич 45, Қозоғистон, Украина ва Беларусда эса 20 фоизга пасайди.

Учрашувда вазир мамлакат ҳақида ҳужжатли фильм олиш учун Ўзбекистонга тасвирга олиш гуруҳини жўнатиш, Таиланд сайёҳлик ҳамжамиятида «Буюк Ипак йўли» брендини илгари суришни бошлашни таклиф этди. Шунингдек, томонларнинг сайёҳлик кўргазмаларида кенг иштирок этиши, икки давлат сайёҳлик салоҳиятини янада оммалаштириш учун соҳа вакиллари ва журналистларнинг сафарларини ташкиллаш масалалари муҳокама этилди.