Butunjahon boks assotsiatsiyasi (WBA) versiyasi bo‘yicha superog‘ir vazn toifasida sobiq jahon chempioni, o‘zbekistonlik Ruslan Chagayev sog‘lig‘idagi muammolar sababli faoliyatini rasman yakunladi. Bu haqda bokschining menejeri Timur Dugazayev “TASS”ga ma’lum qildi.
Avvalroq Ruslanning turmush o‘rtog‘i Viktoriya Chagayeva u faoliyatini yakunlaganini tasdiqlagandi.
“Ruslan ko‘zidagi muammolar tufayli faoliyatini rasman yakunladi. Biz Chagayevga xayrlashuv jangi – Lukas Braun bilan revanshni taklif qilgandik. Ammo u karyerasini tugatishga qaror qildi, sog‘liq muhimroq”, – dedi Dugazayev.
Ruslan Chagayev 2016-yilning 5-mart kuni Grozniy shahrida avstraliyalik Lukas Braunga qarshi jang o‘tkazib, 10-raundda texnik nokaut bilan mag‘lub bo‘lgan va chempionlik kamarini boy bergandi.
Keyinroq Lukas Braunning qon tahlilida doping aniqlandi. Bokschilar o‘rtasidagi jang natijasi bekor qilinib, avstraliyalik chempionlik kamaridan mahrum etildi. Shundan so‘ng, WBA chempionlik kamarini Chagayevga qaytardi va Ruslanga Fres Okendo bilan majburiy jang o‘tkazish uchun 120 kun muhlat berdi.
O‘zbekistonlik 37 yoshli bokschi majburiy jang o‘tkazmagani uchun WBA uni chempionlik kamaridan mahrum qildi va WBA reytingidan o‘chirildi.
Ma’lumot uchun, 2006-yil Chagayev jahonning sobiq chempioni — Puerto-rikolik Jon Ruisni mag‘lub etishga muvaffaq bo‘lgandi. 2007-yilga kelib esa u WBA yo‘nalishi bo‘yicha jahon chempionligini qo‘lga kiritdi. Bu yo‘lda o‘zbekistonlik bokschi rossiyalik Nikolay Valuyevni mag‘lubiyatga uchratgandi.
Professional ringdagi faoliyati davomida Chagayev 38 ta jang o‘tkazib, 34 g‘alaba (shulardan 21 tasi nokaut bilan), 3 mag‘lubiyat va 1 durangga erishgan.
Izoh (0)