Саудия Арабистонининг 5 нафар чегарачиси 25 июль, душанба куни мамлакатнинг жанубий қисмида, Яман билан чегарадаги тўқнашув оқибатида ҳалок бўлди. Бу ҳақда «ТАСС» хабар бермоқда.
«Душанба куни эрталаб соат олтида чегара хизмати ходимлари Хабаш ҳудуди орқали Саудия Арабистони чегарасини ноқонуний равишда кесиб ўтмоқчи бўлган қуролланган гуруҳ билан тўқнашди. Натижада 5 нафар аскар ҳалок бўлди», – дейилади Саудия Арабистони ИИВнинг баёнотида.
Вазирликнинг қайд этишича, отишма 8 соатдан ортиқ давом этган. Ҳодиса учун жавобгарлик кимнинг зиммасида экани хабар қилинмаган.
Яманда 2014 йилнинг август ойидан буён маҳаллий ҳукумат кучлари ва шиа исёнчилари (хусийлар) ўртасида тўқнашувлар тўхтамаяпти. БМТнинг маълумотларига кўра, қуролли тўқнашувлар оқибатида 6 400 дан зиёд киши ҳалок бўлди, 30 мингдан ортиғи жароҳат олган.
Изоҳ (0)