БМТ: Афғонистонда йил бошидан бери 1,6 минг тинч аҳоли вакили жанговар ҳаракатлар қурбони бўлди
Афғонистонда 2016 йилнинг биринчи ярмида 1,6 мингдан ошиқ тинч аҳоли вакили жанговар ҳаракатлар қурбони бўлди, 3,5 мингдан ортиқ одам жароҳат олди. Бу ҳақда БМТнинг Афғонистонга кўмак миссияси ҳисоботида маълум қилинди, дея хабар беради «ТАСС».
«Ўтган йилнинг 6 ойига нисбатан қурбонлар ва жабрланганлар 4 фоизга қўпайди. Уларнинг умумий сонидан (5166 киши) деярли учдан бири (1509) болалардир. Юз берган фожиаларнинг тахминан 60 фоизи ‘Толибон’ ҳаракати жангарилари зиммасида. Ачинарлиси шундаки, фуқаролар одатий машғулотлари пайти — ибодат, ўқиш, иш, касалхонада даволаниш, сув учун йўл олганида ўлимга дуч келган», — дейилади ҳисоботда.
Миссия раҳбари Тадамичи Ямамотога кўра, бундай нохуш ҳолат можаро томонларини тинч аҳоли азият чекишига чек қўйиш бўйича чоралар кўришга ундаши керак.
